კონგრესმენი ადამ კინზინგერი ღარიბაშვილის განცხადებას, რომ 2012 წლამდე აშშ საქართველოს ხელისუფლებას სასამართლოს პრობლემებზე არ აკრიტიკებდა, "სრულ სიცრუეს" უწოდებს. საქართველოს მეგობართა ჯგუფის თანათავმჯდომარე ტვიტერზე წერს, რომ საერთაშორისო პარტნიორები ხშირად იყვნენ კრიტიკულები.

"ეს არის სრული სიცრუე. ჩვენ ვიყავით კრიტიკულები და ხშირად. ახლა, როგორც ჩანს, პროგრესი იკლებს და საქართველოს მთავრობა აშკარად არღვევს შეთანხმებას", — წერს ადამ კინზიგერი.

შარლ მიშელის დოკუმენტის შეუსრულებლობაზე და უზენაესი სასამართლოს მოსამართლეების შერჩევის პროცესის არშეჩერებაზე საერთაშორისო პარტნიორების კრიტიკის პასუხად პრემიერმინისტრმა ღარიბაშვილმა 17 ივლისს თქვა, რომ "სამწუხაროდ", მათგან კრიტიკა არ მოუსმენია 2012 წლამდე სასამართლოს მიმართ.

გაიგე მეტი:

მას გუშინვე უპასუხა საქართველოში ამერიკის შეერთებულ შტატების ყოფილმა ელჩმა. იან კელის განცხადებით, ღარიბაშვილი იტყუება. მან 2012 წლამდე პერიოდში მართლმსაჯულების გამო ხელისუფლებს კრიტიკის რამდენიმე მაგალითი ჩამოთვალა.

აღსანიშნავია, რომ ღარიბაშვილის ამ განცხადებამდე მმართველმა პარტიამ ირაკლი კობახიძის, არჩილ თალაკვაძის და შალვა პაპუაშვილის სახელით განცხადება გაავრცელა, სადაც ნათქვამია, რომ "ცალკეული ჩინოსნების არაკეთილსინდისიერი ქმედებების გამო", ქვეყნის მთავარ სტრატეგიულ პარტნიორს, ამერიკის შეერთებულ შტატებს შარლ მიშელის შეთანხმების შესრულების შესახებ უმაღლეს დონეზე მიეწოდება დამახინჯებული ინფორმაცია. პარტიაში არ აკონკრეტებენ, ვის ადანაშაულებენ აშშ-სთვის დამახინჯებული ინფორმაციის მიწოდებაში, თუმცა პაპუაშვილმა მალევე თქვა, რომ მაღალჩინოსანი, რომელმაც აშშ-ს "დამახინჯებული" ინფორმაცია მიაწოდა, ქართველი არ არის.

აშშ ქართული ოცნებას შარლ მიშელის შეთანხმების შეუსრულებლობის გამო აკრიტიკებს. შარლ მიშელის დოკუმენტში პირდაპირ წერია, რომ პარლამენტმა "უზენაეს სასამართლოში არსებული წესებით დანიშვნებისგან თავი უნდა შეიკავოს". მას შემდეგ, რაც ქართულმა ოცნებამ პირდაპირ გამოაცხადა, რომ მოსამართლეების შერჩევის პროცესს არ შეაჩერებს და თან ამტკიცებდა, რომ დოკუმენტის პირობებს ასრულებს, აშშ-ის საელჩომ ტვიტერზე გამოაქვეყნა დოკუმენტის ფოტო, სადაც ყვითლად არის მონიშნული შეთანხმების ის ნაწილები, რომლებიც სასამართლო რეფორმას ეხება. მათ შორის ის წინადადებაც, სადაც საუბარია მოსამართლეების შერჩევის შეჩერებაზე.

მიუხედავად ამისა, პარლამენტმა 12 ივლისს რიგგარეშე სესიაზე უზენაესი სასამართლოს მოსამართლეობის 9 კანდიდატიდან 6 დაამტკიცა. უმრავლესობის მხარდაჭერა იმ კანდიდატებმა მოიპოვეს, რომელთა დაკავშირებითაც სამართლის საკითხებზე მომუშავე ორგანიზაციებს კითხვები აქვთ მათ კავშირებზე ე.წ. სასამარ თლო კლანთან. სამოქალაქო სექტორი და დიპლომატები საქართველოს პარლამენტს მოუწოდებდნენ, არ აერჩია უზენაესი სასამართლოს მოსამართლეები ევროპული საბჭოს პრეზიდენტ შარლ მიშელის დოკუმენტით გათვალისწინებული მართლმსაჯულების რეფორმის გატარებამდე. პროცესში არ მონაწილეობდა ოპოზიციის ძირითადი ნაწილი და სახალხო დამცველი.

გაიგე მეტი