2019 წელს ახალი სერიალი Modern Love (თანამედროვე სიყვარული) გამოვიდა, რომელმაც უამრავი მაყურებლის გული მაშინვე მოიგო, თუმცა ამის მერე იყო 2020, პანდემია და სხვა უამრავი რამ, რის გამოც თითქოს საუკუნე გავიდა.

თუმცა ეს სატელევიზიო შოუ ახალი სეზონით ბრუნდება და იმ ადამიანურ ურთიერთობებს გაგვახსენებს, რომლებიც ბოლო პერიოდში ასე ძალიან გვენატრებოდა.

სულ ცოტა ხნის წინ გამოქვეყნებული მეორე სეზონის პირველი ტრეილერი როგორც სიხარულის, ისე მწუხარების ცრემლებს გვპირდება:

თანამედროვე სიყვარულის ახალი სეზონის მთავარი სიახლე ისაა, რომ მასში ვიხილავთ კიტ ჰარინგტონს, რომელსაც მაყურებლების დიდი ნაწილი Game of Thrones-დან ჯონ სნოუს როლით იცნობს.

ამ ინგლისელ ვარსკვლავთან ერთად ახალი სამსახიობო გუნდის წევრები არიან სხვა ცნობილი სახეებიც: ლუსი ბოიტონი, კეტრინ გალაჰერი, მინი დრაივერი, ანა პეკუინი და სხვები.

თანამედროვე სიყვარული ამერიკული რომანტიკული კომედიაა, რომელიც The New York Times-ის ყოველკვირეული სვეტების მიხედვით გადაიღეს — ყველა ისტორია ნამდვილ ამბავს ეფუძნება და ისეთ მნიშვნელოვან თემებს ეხება, როგორიცაა, მაგალითად, ფსიქიკური ჯანმრთელობა.

ეს სატელევიზიო შოუ ანთოლოგიური ტიპისაა — მისი თითოეული ეპიზოდი განსხვავებული გმირების განსხვავებულ ისტორიებს მოგვითხრობს. ასეთივე იქნება მეორე სეზონიც, რომელშიც როლებს სულ ახალი სახეები მოირგებენ.

ახალი ისტორიების ხილვა და ახალი პერსონაჟების გაცნობა 13 აგვისტოდან შეგვეძლება.