აშშ-ს სახელმწიფო დეპარტამენტი საქართველოს პარლამენტის მიერ უზენაეს სასამართლოში მოსამართლეების დანიშვნის გამო შეშფოთებას გამოთქვამს და აცხადებს, რომ ეს ეწინააღმდეგება მმართველ და ოპოზიციურ პარტიებს შორის დადებულ 19 აპრილის შეთანხმებას.

"ევროკავშირისა და აშშ-ს შუამავლობით, ევროპული საბჭოს პრეზიდენტის, შარლ მიშელის ეგიდით შექმნილმა 19 აპრილის შეთანხმებამ, მხარეებს დააკისრა უზენაეს სასამართლოში "ყველა მიმდინარე გასაუბრების" შეჩერება, სანამ არ იქნებოდა "ამბიციური სასამართლო რეფორმა".

ჩვენ მოვუწოდებთ საქართველოს ხელისუფლებას აღასრულონ 19 აპრილის შეთანხმება, მათ შორის, უზენაესი სასამართლოში დანიშვნების შეჩერებით, სანამ გამჭვირვალე, სრულყოფილი, ინკლუზიური სასამართლო რეფორმა არ იქნება. ეს არის ის, რაზეც საქართველოს პოლიტიკური ლიდერები, მმართველი პარტიის ჩათვლით, შეთანხმდნენ.

ამის შუსრულებლობა, კიდევ უფრო შეამცირებს ქართული საჯარო და საერთაშრისო საზოგადოების რწმენას სასამართლოს მიმართ და საფრთხეს შეუქმნის საქართველოს დემოკრატიის განვითარებას. 19 აპრილის შეთანხმების შეუსრულებლობა, ასევე, შეასუსტებს ინვესტორების ნდობას და შეამცირებს საქართველოს პოლიტიკური და სოციალური ინსტიტუტების მდგრადობას", — წერია განცხადებაში.

პარლამენტმა 12 ივლისს რიგგარეშე სესიაზე უზენაესი სასამართლოს მოსამართლეობის 9 კანდიდატიდან 6 დაამტკიცა. სამოქალაქო სექტორი და დიპლომატები საქართველოს პარლამენტს მოუწოდებდნენ, არ აერჩია უზენაესი სასამართლოს მოსამართლეები ევროპული საბჭოს პრეზიდენტ შარლ მიშელის დოკუმენტით გათვალისწინებული მართლმსაჯულების რეფორმის გატარებამდე. პროცესში არ მონაწილეობდა ოპოზიციის ძირითადი ნაწილი და სახალხო დამცველი.

19 აპრილის შარლ მიშელის შეთანხმების თანახმად, უზენაეს სასამართლოში ყველა მიმდინარე დანიშვნა უნდა შეჩერდეს და ხელახლა დაიწყოს განცხადებების მიღება ახალ კანდიდატებთან დაკავშირებითაც მას შემდეგ, რაც ახალი კანონი ძალაში შევა. მმართველ პარტიაში კი აცხადებდნენ, რომ ევროპული საბჭოს პრეზიდენტ შარლ მიშელის შეთანხმებით გათვალისწინებული პირობა დოკუმენტის ხელმოწერამდე უკვე შესრულებული აქვთ და უზენაესი სასამართლოს მოსამართლეების არჩევის პროცესს არ შეაჩერებდნენ.

გაიგეთ მეტი