Front Line Defenders გმობს ლგბტქი+ პირების უფლებათა დამცველებისა და ჟურნალისტების მიზანმიმართულ დაშინებას. მათი განცხადებით, ამან შეიძლება, გამანადგურებელი გავლენა იქონიოს სამოქალაქო საზოგადოებაზე და არ უწყობს ხელს საქართველოში უსაფრთხო და ხელსაყრელი გარემოს შექმნას, სადაც უფლებადამცველები და ჟურნალისტები შეძლებენ თავიანთი საქმიანობის განხორციელებას.

ადამიანის უფლებებზე მომუშავე ერთ-ერთი საერთაშორისო ორგანიზაციის დასკვნაში გაანალიზებულია 5-6 ივლისს ძალადობრივი კონტრაქციის დროს ჰომოფობიური ჯგუფების ქმედებები, ასევე ნათქვამია, რომ ეს არ არის ძალადობის პირველი შემთხვევა და საუბარია 2013 წლის 17 მაისს და 2019 წელს ოსკარზე ნომინირებული ფილმის And then we danced თბილისში გამართული ჩვენების დროს განვითარებული მოვლენები.

"Front Line Defenders ღრმად არის შეშფოთებული ლგბტქი+ პირების უფლებათა დამცველთა, თბილისი პრაიდის, მოძრაობა სირცხვილიას და ადამიანის უფლებათა სახლის თბილისის ოფისებზე თავდასხმის გამო, რადგან მიიჩნევს, რომ ისინი გახდნენ მოძალადეების სამიზნე უშუალოდ მათი საქმიანობის გამო", — ნათქვამია დასკვნაში.

შედეგად, ორგანიზაცია საქართველოს ხელისუფლებას მოუწოდებს:

• მიიღოს ყველა საჭირო ზომა თბილისი პრაიდის, მოძრაობა სირცხვილიას და ადამიანის უფლებათა სახლის თბილისის ოფისის წევრების ფიზიკური და ფსიქოლოგიური უსაფრთხოების უზრუნველსაყოფად;

• უზრუნველყოს დაუყოვნებლივი, საფუძვლიანი და მიუკერძოებელი გამოძიების ჩატარება ლგბტქი+ პირთა უფლებების დამცველებსა და ჟურნალისტებზე განხორციელებულ ძალადობაზე. ასევე, თბილისი პრაიდის, მოძრაობა სირცხვილიას და თბილისში ადამიანის უფლებათა სახლის ოფისებზე შეტევის ფაქტებზე და ჟურნალისტ ალექსანდრე ლაშქარავას გარდაცვალებაზე, შედეგების გამოქვეყნების და პასუხისმგებელი პირების საერთაშორისო სტანდარტების შესაბამისად დასჯის მიზნით;

• მიიღოს ზომები იმის უზრუნველსაყოფად, რომ მთავრობის წარმომადგენლებმა და სხვა საჯარო პირებმა თავი შეიკავონ ისეთი განცხადებების გაკეთებისა და დეკლარირებისგან, რომლითაც ხდება ლგბტქი+ პირების უფლებათა დამცველების ლეგიტიმური საქმიანობის სტიგმატიზირება და საჯაროდ დაგმონ ამ უფლებადამცველთა ცილისწამება;

• უზრუნველყოს ნებისმიერ ვითარებაში იმის გარანტირება, რომ საქართველოში ყველა უფლებადამცველს შეეძლება, განახორციელოს ადამიანის უფლებების დაცვის ლეგიტიმური საქმიანობა ანგარიშსწორების შიშის და ყოველგვარი შეზღუდვების გარეშე, მათ შორის სასამართლო შევიწროვების.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლსს გარდაიცვალა. ამის გამო, მედიამ იმ დღესვე საპროტესტო აქცია გამართა, რადგან სახელმწიფომ მედიის და გამოხატვის უფლების დაცვა ვერ/არ უზრუნველყო და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა. მედიის პროტესტი გრძელდება.