საპატრულო პოლიციის დეპარტამენტის უფროსი, ვაჟა სირაძე 5 ივლისის ძალადობრივ კონტრაქციაზე პოლიციის ნაკლებობას იმით ხსნის, რომ უსაფრთხოების "დაცვა" არაერთ ლოკაციაზე უწევდათ. ამის შესახებ მან ჟურნალისტებს რუსთაველის გამზირზე განუცხადა, სადაც მდუმარე აქცია მიმდინარეობს და გუშიდელისგან განსხვავებით, ძალადობრივი კონტრაქციის მონაწილეებს აკავებენ.

"შინაგან საქმეთა სამინისტრო მობილიზებული იყო სრული შემადგენლობით მობილიზებული იყო გუშინ თბილისის ქუჩებში იმ ადგილებზე, სადაც ხდებოდა გარკვეული ინციდენტები. როგორც დღეს, ასევე გუშინ, ძალები მობილიზებული იყო, მაგრამ განსხვავებით დღევანდელისგან, გუშინ გვქონდა არაერთი ლოკაცია, სადაც გვიწევდა საზოგადოებივი წესრიგისა და უსაფრთხოების დაცვა. მაქსიმალურად შევეცადეთ, რომ თითოეული ინციდენტი აღგვეკვეთა, ასევე, დაწყებულია გამოძიება. შინაგან საქმეთა სამინისტრო თითოეულ ფაქტზე მიიღებს შესაბამის ზომებს. უმკაცრესად დაისჯებიან პირები, ვინც იძალადა ჟურნალისტებზე, მოქალაქეებზე და ა.შ.", — აცხადებს სირაძე.

ჟურნალისტების კითხვაზე, რატომ არ აკავებდნენ მოძალადეებს, რომლებიც მედიის წარმომადგენლებს პოლიციის თანდასწრებით ესხმოდნენ თავს, სირაძე პასუხობს:

"არსებობს პროპორციული და ადეკვატური ძალა, რაც უნდა გამოიყენოს პოლიციამ. შესაბამისად ვმოქმედებდით".