შერიგებისა და სამოქალაქო თანასწორობის სახელმწიფო მინისტრი, პაატა ზაქარეიშვილი, მის მიერ გაკეთებულ განცხადებას იმის შესახებ, რომ ხურჩაში მომხდარი მკვლელობა გამონაკლისია და მას არ აქვს სისტემური ხასიათი, როგორც ეს ნაციონალური მოძრაობის დროს იყო, ნანობს:

"პირველად, რაც მე ვარ სახელმწიფო მინისტრის თანამდებობაზე, პირველად მაქვს ღრმა სინანულის განცდა, რომ ჩემი სიტყვები არათუ ისე არ იყო გაგებული, არამედ არ იყო სწორად ნათქვამი".

ზაქარეიშვილმა განსაკუთრებული სინანული გამოხატა გარდაცვლილ გიგა ოთხოზორიას ოჯახის მიმართ, რომელბმაც შესაძლოა მინისტრის განცხადება მტკივნეულად აღიქვეს:

"ვნანობ და დარწმუნებული ვარ, რომ ეს იყო წამოცდენილი სიტყვა, წინდაუხედავი სიტყვა. მე ვაპირებ ჩავიდე დაკრძალვაზე და პატივი მივაგო გიგა ოთხოზორიას ხსოვნას".

საოკუპაციო ხაზთან გიგა ოთხოზორიას მკვლელობასთან დაკავშირებით რამდენიმე დღის წინ პაატა ზაქარეიშვილმა განაცხადა, რომ ეს იყო საშინელი მკვლელობა, მაგრამ ქვეყანაში მძიმე მდგომარეობა არ არის. მისი თქმით, ეს იყო გამონაკლისი მკვლელობა, ასეთ მოვლენებს კი სისტემური ხასიათი, როგორც ეს ნაციონალური მოძრაობის დროს ჰქონდა, არ აქვს.