უზენაესი სასამართლოს მოსამართლეობის კანდიდატმა, მოქმედმა ადვოკატმა, პაატა შავაძემ საქართველოს დემოკრატიული ინსტიტუტის იურისტის, გვანცა წულუკიძის კრიტიკის საპასუხოდ მას ხმოვანი შეტყობინება გაუგზავნა, რომელშიც "გვანცუშკებით" და დამცინავად მიმართავს.

პაატა შავაძე იუსტიციის უმაღლეს საბჭოში გასაუბრებაზე მესამედ არ გამოცხადდა. ამის შესახებ ინფორმაცია მინდა ვენდო სასამართლოს ფეისბუქგვერდზე გავრცელდა, რომელიც მოსამართლეების არჩევის პროცესს აკვირდება. სწორედ აღნიშნული პოსტის კომენტარებში გვანცა წულუკიძემ დაწერა: "მესამედ არ მივიდა და თუ არ უნდა, კი თქვას". როგორც იურისტი On.ge-ს უყვება, კომენტარის დაწერიდან 10-15-ში მოსამართლეობის კანდიდატისგან ხმოვანი შეტყობინება მიიღო.

"გვანცუშკები, გვანცუშკები, ბოდიში რომ შენთან ვერ შევათანხმე, მოვდივარ თუ არ მოვდივარ, მესამედ არ მოვედი, მეოთხედ არ მოვედი. აწი შეგათანხმებ, ხო? როცა ვერ ჩამოვალ ან სადმე თუ მივდივარ ან ვერ მოვდივარ, შეგითანხმებ და აუცილებლად შეგატყობინებ და უნდა იცოდე სადმე თუ მივდივარ, რომელ კონკურსზე გამოვცხადდები, რომელზე — არა. იმიტომ რომ შენ ხო საქმე მეტი არაფერი გაქვს, ასეთ რაღაცებს აკვირდები და მერე ხლართავთ რაღაცებს. ბოდიში, რომ ვერ შეგატყობინე და შენს დამქაშებს, ენჯეოშნიკებს, რომ ვერ მოვდიოდი. შენი საქმე არაა, მე სად წავალ და სად მოვალ. გამიგე ქალბატონო? შემდეგში გაითვალისწინე და სხვებზე იქირქილე. შენი საქირქილო არაფერი არ მაქვს მე", — ისმის შეტყობინებაში, რომელიც თავდაპირველად სირცხვილიამ გაავრცელა.

გვანცა წულუკიძე ამბობს, რომ მოსამართლეობის კანდიდატმა მის მიმართ ფამილარული და დამცინავი ტონი გამოიყენა.

"რაღაც ისეთ ნიშნებსაც ვხედავ, რომ თითქოს უნდა გენდერული ნიშნით დაგამციროს. ასეთი შთაბეჭდილება დამრჩა. რაც ძალიან სამწუხაროა, იმიტომ რომ ის ადამიანი არის მოქმედი ადვოკატი და არ არის ჩვეულებრივი რიგითი ადამიანი და იდეაში ადამიანის უფლებებს იცავს", — აღნიშნავს წულუკიძე.

აღნიშნულ ჩანაწერთან დაკავშირებით On.ge პაატა შავაძესაც ესაუბრა. მას არ მიაჩნია, რომ ეს მიმართვა შეურაცხმყოფლია. მოსამართლეობის კანდიდატმა არ უპასუხა კითხვას, რატომ გადაწყვიტა მსგავსი ხმოვანი შეტყობინება გაეგზავნა იურისტისთვის და არც სხვა კითხვებს უპასუხა. ამასთან, სატელეფონო საუბრისას On.ge-ს ჟურნალისტის მიმართ ხმის ტონს აუწია.

"ჟურნალისტი რომ ხარ, შვილო, ყველაფრის უფლება კი არ გაქვს. კიდე თუ გაინტერესებს რამე, გიპასუხებ, ამ შეკითხვას ვტოვებ ასე იმიტომ, რომ არ ვაკეთებ ასეთ რაღაცებზე კომენტარებს", — გვითხრა შავაძემ, თუმცა სხვა კითხვებს პასუხი აღარ გასცა და ტელეფონი გათიშა.

საქართველოს იუსტიციის უმაღლეს საბჭოში უზენაესი სასამართლოს მოსამართლეობის კანდიდატებს არჩევენ. პაატა შავაძეს უზენაესი სასამართლოს მოსამართლეობა წარსულშიც უცდია. 2019 წელს მან უარი თქვა იუსტიციის საბჭოს არამოსამართლე წევრის, ნაზი ჯანეზაშილის კითხვებზე გაეცა პასუხი. გარდა ამისა, კანდიდატი გასაუბრებისას საბჭოს იმ წევრებსა და მოსამართლეებს აქებდა, რომლებსაც ოპოზიცია და არასამთავრობოების ნაწილი "კლანად" მოიხსენიებს.