აშშ-ის ელჩის საქართველოში კელი დეგნანის, განცხადებით, ევროკავშირსა და NATO-ში გაწევრიანების წინაპირობა კანონის უზენაესობა და მიუკერძოებელი სასამართლო სისტემაა. მისივე თქმით, იუსტიციის უმაღლესმა საბჭომ კანდიდატთა სია წარმოადგინა, თუმცა ახლა პარლამენტზეა დამოკიდებული და მათი უფლებამოსილებაა 19 აპრილის შეთანხმება რამდენად შესრულდება. შეთანხმებაში კი მკაფიოდ არის გაწერილი, რომ საკითხზე ფართო, ინკლუზიური, მრავალპარტიული მსჯელობა გაიმართოს.

"ძალიან მოხარული ვარ, რომ მოსამართლეებმა გააკეთეს კომენტარი, რომ ისინი მზად არიან ითანამშროლონ ყველასთან სასამართლო სისტემის გაუმჯობესების მიმართულებით. აშშ და საერთაშორისო პარტნიორები ბოლო 25 წლის განმავლობაში ეხმარებოდნენ საქართველოს, რადგან სწორედ კანონის უზენაესობა, მიუკერძოებელი სასამართლო სისტემა არის წინაპირობა NATO-სა და ევროკავშირიში გაწევრიანებისათვის", — განაცხადა დეგნანმა.

17 ივნისს იუსტიციის უმაღლესმა საბჭომ პარლამენტს უზენაესი სასამართლოს მოსამართლეობის 9 კანდიდატს წარუდგინა. კერძოდ, გიორგი გოგიაშვილი, გოჩა აბუსერიძე, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე, ლაშა გოჩიაშვილი. საბჭოს არამოსამართლე წევრი, ნაზი ჯანეზაშვილი On.ge-სთან დადებითად აფასებს ქეთი მესხიშვილისა და ეკა ზარნაძის წარდგენას, თუმცა ამბობს, რომ ამ მოდელით უმრავლესობაში კვლავ ე.წ. კლანი რჩება, კარგი მოსამართლეები კი — უმცირესობაში.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.