მშენებლობების დასრულებას კვირები, თვეები სჭირდება, რადგან შენების პროცესის გარდა ბევრი რამაა გასათვალისწინებელი: დეტალური დაგეგმვა, სამშენებლო ადგილის შემოწმება, ამინდზე დაკვირვება, თანამშრომლების სწორად შერჩევა და ა.შ.

თუმცა, დღეს განსაკუთრებულ შემთხვევაზე გიამბობთ. ხუნანის პროვინციაში, ქალაქ ჩანშაში 10-სართულიანი შენობა 28 საათსა და 45 წუთში წამოიჭიმა. ახალი ნაგებობა Broad Group-ს ეკუთვნის, რომელმაც ვიდეოც გამოაქვეყნა, სადაც ჩანს, როგორ მიმდინარეობდა მშენებლობის პროცესი.

როგორც აღმოჩნდა, ტექნოლოგიები ჩვენს ცხოვრებას არამარტო ამარტივებენ, დროსაც გვიზოგავენ და ერთ დროს წარმოუდგენელი შედეგები უფრო და უფრო რეალური ხდება. 10-სართულიანი შენობა რამდენიმე ბინას იტევს, რომლებიც წინასწარ ააწყვეს. სისტემა, რომელიც წინასწარ დაკომპლექტებული ვეება "კონტეინერების" გაერთიანებას გულისხმობს, მშენებლობაში ახალ სიტყვას ამბობს და ის პირველად სწორედ Broad Group-მა გამოიყენა.

ვიდეოში ვხედავთ, რომ მოდულებს ერთმანეთზე ამწეების გამოყენებით ათავსებენ, ამის შემდეგ ისინი გასამაგრებლად ღერძებს, ჭანჭიკებსა და საკეტებს იყენებენ, შემდეგი ეტაპი კი წყლისა და ელექტროობის გაყვანილობების დამონტაჟება და ავეჯის შეტანაა. ცნობილია, მშენებლობაზე რამდენიმე მუშა და მხოლოდ 3 ამწე მუშაობდა.

დეველოპერული კომპანია აცხადებს, რომ შენობა მიწისძვრას უძლებს და მისი დაშლა და სხვა ადგილას გადატანაც რეალურია.