ექსპრემიერ გახარიას პარტიას ბათუმში ნაქირავებ ოფისს მეპატრონე ატოვებინებს. თავდაპირველად ინფორმაცია ამის შესახებ ტელეკომპანია იმედმა გაავრცელა. ტელევიზია ამბობს, რომ გადაწყვეტილების მიზეზი ბოლო დროს განვითარებული მოვლენები და სააკაშვილსა და გახარიას შორის "შესაძლო კავშირზე" მედიაში გაშუქებული ინფორმაცია გახდა.

"კომერციული ფართი არის ჩემი პირადი საკუთრება. შესაბამისად, ხელშეკრულება, რომელიც გაფორმებული იყო, მაძლევს სრულ უფლებას, გავაუქმო ხელშეკრულება, არის შესაბამისი მუხლი. მიზეზი — სურათი, რომელიც იყო ხელშეკრულების გაფორმების მომენტში და არის დღეს, რადიკალურად განსხვავებულია, რაც ჩემთვის კატეგორიულად მიუღებელია, ამიტომ, მივიღე ეს გადაწყვეტილება. რასაც ვხედავ ტელევიზორში, არის ჩემთვის მიუღებელი, რაზეც თქვენი ტელევიზია საუბრობს, რისიც მე მჯერა, არ მომწონს, მიუღებელია", — ამბობს ოფისის მეპატრონე, ლაშა ახალაია იმედთან სატელეფონო ინტერვიუში.

მოგვიანებით ბრიფინგი გამართა პარტიის საქართველოსთვის აჭარის ორგანიზაციის ხელმძღვანელმა, ირაკლი მიქელაძემ. მისი თქმით, მმართველი პარტია იქცევა ზუსტად ისე, როგორც ნაციონალური მოძრაობა 2012 წელს. მიქელაძემ აღნიშნა, რომ ოფისის მეპატრონემ დღეს განცხადება სახელისუფლებო მედიის საშუალებით გააკეთა, ხოლო ჯერ კიდევ გუშინ მათი გუნდის მხარდაჭერას აფიქსირებდა. გახარიას პარტიის აჭარის ორგანიზაციის ხელმძღვანელი ამბობს, რომ მეპატრონე დააშინეს.

"სამწუხაროდ, ეს არ არის პირველი შემთხვევა, როდესაც ადამიანები ღიად გვიფიქსირებენ, რომ მიუხედავად მათი დიდი სურვილისა, მოგვაქირაონ ოფისი, ვერ ახერხებენ იმ დაშინებისა და შანტაჟის გამო, რომელიც მათ მიმართ ხორციელდება. ჩვენ აბსოლუტურად გვესმის მისი და თანავუგრძნობთ. რა თქმა უნდა, გავითვალისწინებთ მის აზრს, რთულ მდგომარეობას და ოფისს დავტოვებთ", — ამბობს მიქელაძე.

მისივე თქმით, ეს ვერ გახდება დაბრკოლება და მუშაობას არ შეაჩერებენ.

"თუ ამ ქალაქში ყველა ადამიანს შეაშინებენ და ამ რეგიონში, რომ ვერ მოგვაქირაონ ოფისში, ჩვენ საკუთარ სახლებში გავხსნით ოფისს და გავაგრძელებთ მუშაობას მოქალაქეების პრობლემების გასაგებად და მოსაგვარებლად ყოველდღიურ რეჟიმში", — აცხადებს მიქელაძე.

გიორგი გახარიამ აჭარის ოფისი 14 ივნისს, პარტიის წევრებთან ერთად გახსნა.