ნაციონალური მოძრაობის წევრის, ლევან ხაბეიშვილის კითხვის პასუხად, ქართული ოცნების დეპუტატი, ირაკლი ზარქუა ამბობს, რომ მმართველ გუნდში კარგი საათი ბევრს აქვს. მას არასწორად მიაჩნია "ოცნების" დეპუტატების ძვირადღირებულ საათებზე გაკეთებული აქცენტი.

"კარგი სათი ბევრს უკეთია ჩვენთან. მათ შორის, ბიზნესმენები, რომელსაც მერე ჟურნალისტები დასდევენ. ჩიგოგიძეს რო ეტყვი რას გიკეთია ეს საათიო, ეს ობიექტურობაა? ზაალ დუგლაძეს რომ ეტყვი, ანტონ ობოლაშვილს დასდევდა ჟურნალისტი და ოპერატორი, რატომ გიკეთია ეს საათიო, ცირკია მეტი არაფერი.

პრემიერი წლების განმავლობაში იყო ბიზნესში, შეძლებული, ნორმალური შემოსავალი ჰქონდა, საათი რომ იყიდოს რა პრობლემაა?" — განაცხადა მან TV პირველის ეთერში.

პარლამენტში პრემიერმინისტრის ანგარიშის წარდგენის შემდეგ ნაციონალური მოძრაობის ლიდერმა, ლევან ხაბეიშვილმა ირაკლი ღარიბაშვილს კონკრეტული ციფრები წარუდგინა, რომელიც ქვეყანაში სოციალურად დაუცველების კვებისთვის განკუთვნილ თანხას, საშუალო ხელფასს, საარსებობ მინიმუმს და სხვა მსგავს საკითხებს ეხებოდა. მანვე აღნიშნა, რომ პრემიერს 6 665 ადამიანის თვიური საარსებო მინიმუმი მაჯაზე ჰკიდია, რადგან მისი საათი 300 000 ლარი ღირს.

პრემიერის მაჯის საათებზე რამდენიმე თვის წინ რადიო თავისუფლებამ ჟურნალისტური გამოძიება გამოაქვეყნა. სადაც აღნიშნული იყო, რომ ღარიბაშვილის მაჯის საათების ჯამური ფასი, სავარაუდოდ, ნახევარ მილიონ ლარს აჭარბებს. მათივე ინფორმაციით, საათების ნაწილი პრემიერს დეკლარირებული არ ჰქონდა.

გარდა ამისა, გამოცემა აღნიშნავდა, რომ ჟურნალისტური გამოძიების ჩატარების მომენტისთვის, ღარიბაშვილს სულ ხუთჯერ ჰქონდა შევსებული ქონებრივი დეკლარაცია და 2012 წლიდან ჯამში 459 ათასი ლარის შემოსავალი ჰქონდა, მაშინ, როცა მისსავე ფოტოებში ასახული საათების ჯამური ღირებულება სულ მცირე 550 ათასი ლარი იყო.