დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, მაღალი ალბათობით, კორონავირუსზე აცრა გარკვეული პერიოდულობით იქნება საჭირო, თუმცა ჯერ არ არის შესწავლილი, რამდენ ხანში ერთხელ დაგვჭირდება ვაქცინაცია.

"ნამდვილად არ იქნება ისე, რომ როგორც წითელაზე — ორჯერ აიცრები და მთელი ცხოვრება გაქვს იმუნიტეტი. ასეთი დიდი ალბათობით არ იქნება, მაგრამ ბუსტერი რამდენ წელიწადში ერთხელ დასჭირდება, ამაზე მიმდინარეობს კვლევები", — განაცხადა გამყრელიძემ.

მისივე თქმით, კვლევებისას უმრავლესობა მაინც იხრება იქითკენ, რომ კორონავირუსი ნაკლები აგრესიულობით, მაგრამ შეიძლება გახდეს სეზონური და აცრაც გარკვეული პერიოდულობით იქნება საჭირო.

"ჯერჯერობით გრძელდება კვლევები, ორჯერადი აცრები რა ხნის განმავლობაში ტოვებს იმუნიტეტს, ასევე, იკვლევენ, უკვე გადატანილ ადამიანებს, რადგან არის შეხედულება, რომ ბუნებრივი იმუნიტეტი უფრო ხანგრძლივია, ვიდრე ხელოვნური. ამავე დროს, არის კვლევები, როცა გადატანის შემთხვევაში ერთი ინექციაც ძლიერი ბუსტერია იმუნიტეტის გახანგრძლივების", — თქვა მან.

გარდა ამისა, On.ge-მ გამყრელიძეს ჰკითხა ე.წ. ბუსტერის, იგივე გამაძლიერებლის შესახებ, რაც გულისხმობს ხელახალ ვაქცინაციას ორჯერადი აცრის შემდეგ. NCDC-ის ხელმძღვანელი ამბობს, რომ ამის აუცილებლობაზე ჯერჯერობით არც ერთი მარეგულირებელი არ საუბრობს, თუმცა მეცნიერები ამ საკითხზე მსჯელობენ.

რაც შეეხება უშუალოდ საქართველოს და იმ მოქალაქეებს, რომლებიც უკვე ორჯერადად არიან აცრილები და სურთ მესამე, გამაძლიერებელი დაიმატონ, ამირან გამყრელიძე ამბობს, რომ ამაზე საუბარი ადრეა.

"ჯერ ჩვენ უნდა ავცრათ მოსახლეობა ორჯერადად და მერე ვიზრუნოთ ბუსტერზე. გიდასტურებთ, რომ ეს შესაძლებელია საჭირო გახდეს", — თქვა მან.

გამყრელიძემ ისაუბრა უკვე აცრილი მოქალაქეების კორონავირუსით ინფიცირების მაჩვენებელზე. მისი ინფორმაციით, საბოლოო მონაცემები, სავარაუდოდ, ივლისში იქნება, თუმცა ამ ეტაპზე ცნობილია, რომ ერთჯერადად აცრილ ადამიანებში ინფიცირების მაჩვენებელი 0,8%-ია, ხოლო ორჯერადად აცრილებში — 0,2%. გამყრელიძის ინფორმაციით, ეს საერთო მაჩვენებელია, თუმცა სხვადასხვა ვაქცინით აცრილებს შორის ამ კუთხით დიდი განსხვავება არ არის.

აღსანიშნავია, რომ 20 მაისს ვაქცინის გამაძლიერებელი დოზის საჭიროებაზე ისაუბრა ამერიკის შეერთებული შტატების ალერგიისა და ინფექციურ დაავადებათა ეროვნული ინსტიტუტის ხელმძღვანელმა, ენტონი ფაუჩიმაც. მისი თქმით, გამაძლიერებელი დოზის მიღება, შესაძლოა, ვაქცინაციიდან ერთ წელში გახდეს საჭირო.