რა შეიძლება ისწავლოს მსოფლიოს ერთ-ერთმა ყველაზე გავლენიანმა და ცნობილმა ადამიანმა, ილონ მასკმა მეხუთეკლასელისგან? როგორც ჩანს, მარკეტინგი.

მეხუთეკლასელმა ამერიკელმა გოგონამ ილონ მასკს სარეკლამო კამპანიისთვის მნიშვნელოვანი რჩევა მისცა. გოგონა მასკს პირადად არ შეხვედრია, თუმცა წერილი მამამისმა Twitter-ის საშუალებით გაავრცელა.

"ილონ, ჩემმა ქალიშვილმა სკოლის პროექტის ფარგლებში წერილი მოგწერა, რომელიც Tesla-ს ელექტრონული ფოსტითაც გადავუგზავნეთ, თუმცა მე აქ განთავსება ვამჯობინე", - წერს ბრიას მამა.

გთავაზობთ პატარა გოგონას წერილს: "შემჩნეული მაქვს, რომ რეკლამით დიდად არ გამოირჩევით, არადა ძალიან ბევრი ადამიანი ავრცელებს Tesla-სთვის სამოყვარულო სარეკლამო ვიდეოებს. მათგან რამდენიმე ნამდვილად კარგი, პროფესიონალური და სახალისოა. მგონი, კარგი იქნება თუ Tesla-ს მხარდამჭერების ვიდეოების კონკურსს ჩაატარებთ, ხოლო გამარჯვებულების ნამუშევრებს ოფიციალურად გამოიყენებთ", - წერს მეხუთეკლასელი ბრია.

ბრიამ პრიზებიც მოიფიქრა: "გამარჯვებულებს შეგიძლია გადასცე ერთწლიანი უფასო დატენვის ვაუჩერი ან გაუმხილო ექსკლუზიური საიდუმლოები მომავალი მოდელის შესახებ"

როგორც წერილიდან ჩანს, ბრიას ტესლასა და მასკის შესახებ მამამ უამბო. ბრიას მამა მანქანების შესახებ წერს და გოგონამ ბევრი რამ იცის თანამედროვე მანქანების შესახებ მამიკოსგან.

მეხუთეკლასელი ბრიას კრეატიული შეთავაზება მასკსა და მის კომპანიას რეკლამის თანხას დააზოგვინებს და ფანების გახარებაშიც დაეხმარება.

ილონ მასკმა ტვიტერზე პასუხი გამოაქვეყნა:

"დიდი მადლობა ამ საყვარელი წერილისთვის. დიდებული იდეა ჩანს. ჩვენ განვახორციელებთ მას"

წესით, ბრია უზომოდ კმაყოფილი უნდა იყოს.