დათვლილი უბნების პირველადი შედეგებით, სომხეთის საპარლამენტო არჩევნებში პრემიერმინისტრობის მოვალეობის შემსრულებელი, ნიკოლ ფაშინიანის პარტია ლიდერობს.

ადგილობრივი მედიის ცნობით, ცენტრალური საარჩევნო კომისიის მიერ გამოქვეყნებულ პირველად შედეგებში, დათვლილია 149 უბანი, საიდანაც ხმების 61,63%-ი ფაშინიანის პარტიამ მიიღო. 17,87%-ით მეორე ადგილზეა რობერტ კოჩარიანი, რომელსაც ბლოკი მე მაქვს პატივი (5,05%) და აყვავებული სომხეთი მოსდევს (1,49).

დღეს, 20 ივნისს სომხეთში ვადამდელი საპარლამენტო არჩევნები გაიმართა. ხმის მიცემა ადგილობრივი დროით, დილის რვა საათზე დაიწყო 2 000-მდე საარჩევნო პუნქტში და საღამოს 8 საათამდე გრძელდებოდა.

არჩევნებში 21 პარტია და 4 ბლოკი მონაწილეობდა. პარლამენტში მოსახვედრად პარტიებმა 5%-იანი ბარიერი უნდა გადალახონ, ბლოკებმა კი 7%-იანი.

პრემიერმინისტრობის კანდიდატებს შორისაა ამჟამად მოვალეობის შემსრულებელი, ყოფილი პრემიერი ნიკოლ ფაშინიანი. ადგილობრივი მედიის ინფორმაციით, მმართველი პარტიის მთავარ კონკურენტად მიიჩნევა ბლოკი, რომელის ლიდერია სომხეთის ყოფილი პრეზიდენტი რობერტ კოჩარიანი.

რამდენიმეთვიანი პროტესტისა და სამხედროების მოთხოვნის შემდეგ, სომხეთის პრემიერმინისტრი, ნიკოლ ფაშინიანი 25 აპრილს გადადგა. ფაშინიანმა განაცხადა, რომ თანამდებობიდან გადადგებოდა და ვადამდელ არჩევნებს დათანხმდებოდა, თუ არ წარადგენდნენ პრემიერმინისტრობის სხვა კანდიდატებს, რაც პარლამენტის დაშლას და რიგგარეშე არჩევნების დანიშვნას გამოიწვევდა. შეთანხმების მიხედვით, სომხეთის პრეზიდენტმა ვადამდელი არჩევნები 20 ივნისს ჩაინიშნა.

ფაშინიანის გადადგომის მოთხოვნით საპროტესტო ტალღა მას შემდეგ გააქტიურდა, რაც ყარაბაღის ომი საერთო შეთანხმებით დასრულდა და რეგიონზე კონტროლი აზერბაიჯანს გადაეცა. ომის შედეგს სომხური მხარე დამარცხებად აღიქვამდა.