ირანელი ბიზნესმენი, ფურია ნაიები მთავარ არხთან სატელეფონო ინტერვიუში პრემიერმინისტრის, ირაკლი ღარიბაშვილის ბიზნესინტერესებზე მიუთითებს და ამბობს, რომ საკუთარი დანაშაულის დამალვის მიზნით, საქართველოში ფულის გამთეთრებლად გამოაცხადეს.

საქმე ეხება 16 ივნისს პროკურატურის მიერ გავრცელებულ ინფორმაციას უკანონო შემოსავლის ლეგალიზაციის შესახებ. კერძოდ, უწყების განცხადებით, 6-მა ადამიანმა $15 მლნ, €20 მლნ და ₾1 მლნ შემოიტანა და ცრუ მეწარმეობას ეწეოდა. მათგან 5 ადამიანი დააკავეს, ხოლო სისხლისსამართლებრივი დევნა მიმდინარეობს ფ.ნ.-ს მიმართ, რომელიც მთავარი არხის ინფორმაციით, ფურია ნაიებია.

"პირველად რუმინეთში შემომიტიეს, ჩემი აქტივების მოპარვა უნდოდათ, ამ პროცესში ჩართული იყო მინდია ჯანელიძე, რომელიც კონტრტერორისტულ დეპარტამენტს ხელმძღვანელობდა. ასევე, ძმები აკაკი და ლაშა ჩხენკელები.

ლაშა ჩხენკელმა მაიძულა, რომ ჩემი საბანკო ანგარიშის ნაწილი მისთვის მიმეცა და ამისთვის ყალბი საბუთები გამოიყენა. სამივე ირაკლი ღარიბაშვილის დავალებებს ასრულებდა. ჩხენკელებიც და ჯანელიძეც ირაკლი ღარიბაშვილის სახელით მელაპარაკებოდნენ. ჯერ ბანკი წამართვეს, შემდეგ ტანკერები მომპარეს და აქეთ დამემუქრნენ", — აცხადებს ის [მთავარი არხის თარგმანი].

ნაიების თქმით, მის წინააღმდეგ საქმის მთავარი მიზეზი ღარიბაშვილის პრემიერმინისტრად დაბრუნებაა.

"რაც ავტომატურად ნიშნავს, რომ მისი გუნდი, აკაკი და ლაშა ჩხენკელებიც დაბრუნდნენ ხელისუფლებაში. ჩემი პრობლემა ის იყო საქართველოში, რომ ირანელი ვარ, ფულის გამთეთრებლად მხოლოდ იმიტომ გამომაცხადეს, რომ თავიანთი დანაშაულის მიჩქმალვა და ჩემი დადანაშაულება სურს", — ამბობს ის.

მისი განცხადებით, საქართველოს მთავრობისა და ამ საქმეში მონაწილე ყველა პირის წინააღმდეგ თეირანის უზენაეს სასამართლოსა და ინტერპოლს მიმართა. ნაიებისვე მტკიცებით, მას ფული საზღვარზე არ გაუტანია.

"ეს არის პროპაგანდა ჩვენ წინააღმდეგ. ფული მთლიანად ქვეყანაშია, მე ერთი დოლარიც არ გამიტანია საზღვარზე. ჩემთვის დაბრალება უნდათ რაღაცის. როგორ უნდა გამეტანა ფული სატვირთო მანქანით? მე რა, სატვირთო მანქანის მძღოლი ვარ? და მაინც, თუ ეს მე გავაკეთე, ესე იგი, საზღვარზე კორუმპირებული ხალხი ჰყავთ", — თქვა მან.

16 ივნისს საქართველოს პროკურატურამ განაცხადა, რომ საბაჟო კონტროლის გვერდის ავლით დიდი ოდენობის თანხების მალულად შემოტანა გამოავლინეს. უწყების ცნობით, შემოტანილი თანხა, მისი უკანონო წარმომავლობის შესანიღბად, დანაშაულებრივი ჯგუფის წევრებმა დაანაწევრეს და მათ მფლობელობასა და მმართველობის ქვეშ არსებული საწარმოების საბანკო ანგარიშებზე გამოგონილი დანიშნულებით განათავსეს.

პროკურატურის ინფორმაციით, შემდგომში, მართლსაწინააღმდეგოდ შეკავშირებულმა პირებმა, მათ მიერ დამზადებული და საბანკო დაწესებულებებში წარდგენილი ყალბი ინვოისებისა და ხელშეკრულებების საფუძველზე, თითქოსდა სხვადასხვა საქონლის შეძენის დანიშნულებით, საწარმოების საბანკო ანგარიშებიდან განახორციელეს მრავალჯერადი ტრანზაქციები სხვადასხვა ქვეყანაში.

უწყების განცხადებითვე, მოიძიეს და დააყადაღეს დანაშაულის ორგანიზატორის, ფ.ნ.-ს და მასთან დაკავშირებული პირების მიერ, სავარაუდოდ დანაშაულებრივი გზით მიღებული შემოსავლით, შეძენილი უძრავ-მოძრავი ქონებები, მათ შორის, ოთხი ბინა, კომერციული ფართი, მიწის ნაკვეთები და სამი ძვირადღირებული მანქანა.