2021 წლის პირველ კვარტალში, გასული წლის შესაბამის პერიოდთან შედარებით, ბიზნეს სექტორში საშუალო თვიური ხელფასი 56,5 ლარით გაიზარდა და 1 283,5 ლარს გაუტოლდა — ამის შესახებ საქსტატის ანგარიშიდან ხდება ცნობილი.

კვლევაში აღნიშნულია, რომ ქალების ანაზღაურება საშუალო ხელფასს 265 ლარით ჩამორჩება და 1 018,6 ლარს უტოლდება, რაც, თავის მხრივ, 2020 წლის პირველ კვარტალთან შედარებით 61 ლარით არის გაზრდილი.

პირველ კვარტალში საწარმოთა ზომის მიხედვით საშუალო თვიური ხელფასი ასე გადანაწილდა:

  • მსხვილი ბიზნესი – 1 341,9 ლარი;
  • საშუალო ბიზნესი – 1 474,5 ლარი;
  • მცირე ბიზნესი – 1 061,9 ლარი;

უნდა აღინიშნოს, რომ 2021 წლის პირველ კვარტალში, გასული წლის იმავე პერიოდთან შედარებით, ბიზნეს სექტორში დასაქმებულთა საშუალო რაოდენობა 9%-ით, 622,7 ათას ადამიანამდე შემცირდა. დასაქმებულთა შორის, 42% ქალი, ხოლო 58% კაცი იყო.

დასაქმებულთა შორის 586,4 ათასი ადამიანი დაქირავებული იყო. მათი რიცხვი 2020 წლის პირველ კვარტალთან შედარებით 8,5%-ით არის შემცირებული. მიმდინარე წლის იანვარ-მარტში საწარმოთა მხრიდან ხელფასებზე 2,3 მილიარდი ლარი გაიცა, რაც გასული წლის იმავე კვარტალთან შედარებით 4,5%-ით ნაკლებია.

აღსანიშნავია, რომ დასაქმებულთა მთლიანი რაოდენობის 41,5% მსხვილ ბიზნესზე მოდის, 22,5% — საშუალოზე, ხოლო დარჩენილი 36% — მცირე ბიზნესზე.

რაც შეეხება დასაქმებულთა რაოდენობას რეგიონების მიხედვით აღნიშნული მაჩვენებელი
შემდეგნაირად ნაწილდება:

  • ქ. თბილისი — 65,4%;
  • აჭარის ა.რ. — 8,1%;
  • იმერეთი — 6,9%;
  • ქვემო ქართლი — 5,8%;
  • სამეგრელო-ზემო სვანეთი — 4%;
  • სხვა რეგიონები — 9,8%;

2021 წლის პირველ კვარტალში დასაქმებულთა რაოდენობის მიხედვით ბიზნეს სექტორში ვაჭრობის, დამამუშავებელი მრეწველობისა და ჯანდაცვის და სოციალური მომსახურების საქმიანობების დარგები ლიდერობენ (შესაბამისად 27,2%, 13,6% და 11,6% წილებით). თუმცა დასაქმებულთა რაოდენობის მიხედვით მნიშვნელოვან წილს იკავებენ მშენებლობის (9%), ტრანსპორტისა და დასაწყობების (8%) და ინფორმაცია და კომუნიკაციის საქმიანობების დარგის საწარმოებიც (4.1%).