გიორგი მარგველაშვილმა სტამბოლის ჰუმანიტარულ სამიტზე რუსეთის მხრიდან საქართველოს მიმართ არსებულ საფრთხეებზე გააკეთა აქცენტი.

"სულ რამდენიმე დღის წინ, ჩვენ მოწმენი გავხდით სასტიკი ტრაგედიისა, როდესაც რუსმა სამხედროებმა უდანაშაულო და მშვიდობიანიქართველი მოქალაქე მოკლეს საოკუპაციო ხაზთან" - მიმართა საქართველოს პრეზიდენტმა 70- მდე ქვეყნის მეთაურს დახურულ შეხვედრაზე.

მარგველაშვილმა ლიდერებთან სიტყვის გამოსვლისას აღნიშნა, რომ საქართველომ კარგად იცის ოკუპაციისა და ეთნიკური წმენდის ტკივილი და ქართველები მუდმივ საფრთხის ქვეშ არიან:

"ჩვენი მოსახლეობის ნახევარი მილიონი დევნილი და იძულებით გადაადგილებული პირია. ჩვენ წინაშე კვლავ დგას გამყოფი ხაზებისა დამცოცავი ოკუპაციის პრობლემა. რუსეთი მუდმივად ავლებს მავთულხლართებსა და ღობეებს საოკუპაციო ხაზის გასწვრივ, ცხინვალისა და აფხაზეთის რეგიონებში, რათა მოახდინოს ხალხის იზოლირება და წაართვას მათ ერთმანეთთან კომუნიკაციის უფლება, მიუხედავად მათი სურვილისა. საქართველოს წინაშე კვლავ დგას მცოცავი ოკუპაციის პრობლემა".

მარგველაშვილის თქმით, საქართველო გაეროს ვალდებულებებს ერთგულად ასრულებს და ის ორიენტირებულია კონფლიქტების მშვიდობიანად მოგვარებაზე.