ქართული ოცნებიდან წასვლის შემდეგ, გიორგი გახარიამ საკუთარი პარტია წარადგინა და ახლა უკვე პარტიის მანიფესტი გამოაქვეყნა. მიუხედავად იმისა, რომ ის საქართველოს პრემიერმინისტრი თითქმის ორი წელი იყო, როგორც გუნდის პრეზენტაციაზე, ასევე, ახალ მანიფესტში ქვეყანაში ცვლილებების საჭიროებაზე საუბრობს. პარტიის პოლიტიკური ხედვები სამ ძირითად მიმართულებას — განვითარებას, დემოკრატიასა და უსაფრთხოებას მოიცავს.

მანიფესტის თანახმად, ახალი პარტიის მიზანია ქვეყანაში ისეთი ეკონომიკური, სოციალური, პოლიტიკური და კულტურული გარემოს შექმნა, რომელიც "საშუალებას მისცემს თითოეულ მოქალაქეს, ჩაერთოს სახელმწიფოს მშენებლობის პროცესში, მოახდინოს საკუთარი პოტენციალის რეალიზაცია მისი და მისი ოჯახის ღირსეული მომავლისთვის".

გახარიას მანიფესტის მიხედვით, პარტიას სურს, დღეს ისეთი "ძლიერი სახელმწიფო" ააშენონ, რომ ხვალ ამ სახელმწიფომ მოქალაქეებს შესაძლებლობა მისცეს იცხოვრონ, "სამართლიან, დემოკრატიულ, ეკონომიკურად განვითარებულ გარემოში".

ქართული ოცნების ყოფილი ლიდერის ახალი პარტიის განცხადებით, ძლიერი სახელმწიფო რამდენიმე პუნქტს მოიცავს, მათ შორის:

• ძლიერ, დემოკრატიულ ინსტიტუტებს;
• ეკონომიკურ პოლიტიკას;
• საგარეო პოლიტიკას;
• სოციალურ პოლიტიკას;
• განათლების სისტემას;
• ადამიანის უფლებების დაცვას;
• დეოკუპაციას, დებორდერიზაციას, გაერთიანებულ საქართველოს;

პრეზენტაციაზე გახარიას განცხადებების მსგავსად, მანიფესტში ყურადღება გამახვილებულია ნეპოტიზმსა და კორუფიცაზე. აქ საუბარია, რომ "ძლიერი სახელმწიფო" მოიცავს კეთილსინდისიერ და ეფექტიან სახელმწიფო მმართველობას, რომელიც თავისუფალია "არაფორმალური გავლენებისგან, კორუფციისგან და ნეპოტიზმისგან", ასევე მართლმსაჯულების სისტემას, რომელიც "თავისუფალია გავლენებისა და კორუფციისგან".

ყოფილი პრემიერმინისტრის გუნდი სასურველი სახელმწიფოს აშენებაში თითოეული მოქალაქის როლს ხედავს, კერძოდ:

• მეწარმის, რომელსაც წვლილი შეაქვს ქვეყნის ეკონომიკურ განვითარებაში;
• პოლიციელს, რომელიც ქმნის საფუძველს უსაფრთხო და მშვიდი გარემოსთვის;
• მასწავლებელის, რომელიც ქმნის საფუძველს სახელმწიფოს უკეთესი მომავლისთვის;
• სამხედრო მოსამსახურის, რომელიცქმნის საფუძველს ქვეყნის ტერიტორიული მთლიანობის აღდგენისთვის და ევროატლანტიკური ინტეგრაციისთვის;
• ფერმერის, რომელიც ქმნის საფუძველს ოჯახის კეთილდღეობისთვის, რეგიონების ეკონომიკური გაძლიერებისა და ქვეყნის განვითარებისთვის;
• ექიმის, რომელიც ქმნის საფუძველს მოქალაქეების ხარისხიანი ჯანდაცვისთვის;
• საჯარო მოხელის, რომელიც ქმნის საფუძველს ძლიერი სახელმწიფო ინსტიტუტების მშენებლობისთვის, ეფექტიანი და მოქნილი სახელმწიფო აპარატისთვის;
• სპორტსმენის, რომელიც ქმნის საფუძველს სახელმწიფოს წარმატებისთვის;
• ხელოვანის, რომელიც ქმნის საფუძველს ქვეყნის წინსვლისთვის;
• ახალგაზრდის, რომლიც ქმნის საფუძველს თანამედროვე სახელმწიფოს განვითარებისათვის.

მანიფესტში ვკითხულობთ, რომ ამავე დროს, სახელმწიფოს მშენებლობა ნიშნავს "მოსახლეობის იმ ჯგუფებზე ზრუნვას, ვისაც ეს ყველაზე მეტად სჭირდება" და შესაბამისად, სახელმწიფოს ვალდებულებაა უზრუნველყოს:

• ბავშვის უფლებათა დაცვა და მხარდაჭერა;
• სოციალურად დაუცველი ოჯახებისთვის დაცვის სამართლიანი სისტემა;
• პენსიონერისთვის უზრუნველი სიბერე, ღირსეული პენსიითა და შესაბამისი ჯანდაცვის სისტემით;
• დევნილების დაბრუნება საკუთარ სახლებში;
• ემიგრანტების დაბრუნებისთვის საქართველოში ცხოვრების შესაბამისი პირობების შექმნა;
• ვეტერანების ღვაწლის ღირსეული დაფასება და მათზე ზრუნვა;
• შეზღუდული შესაძლებლობის მქონე პირებისთვის სისტემური გარანტიების გაძლიერება;
• უმცირესობებისთვის მხარდაჭერის სისტემის გაძლიერება.

29 მაისს გიორგი გახარიამ პარტიისა და გუნდის პრეზენტაცია გამართა. პარტიას საქართველოსთვის ჰქვია. 18 თებერვალს ის პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.