ახალწვეულებმა სამხედრო ფიცი დადეს. ფიცის დადების ცერემონიალი თავისუფლების მოედნის პარალელურად სხვადასხვა ლოკაციაზე, აჭარაში, კახეთში, სამცხე-ჯავახეთში, სვანეთსა და მცხეთაში იმართებოდა. ფიცის დადება რეკრუტებს საქართველოს პრეზიდენტმა მიულოცა.

"მინდა ეს დღე და ესოდენ დიდი ეროვნული მოვლენა მოგილოცოთ თქვენ, საქართველოს ჯარისკაცებო. თქვენ, ვინც დღეს ფიცს დებთ, რომ ერთგულად და შეუდრეკლად ემსახუროთ სამშობლოს. მინდა გისურვოთ, რომ მუდამ წინ გიძღოდეთ გენერალ კვინიტაძის მაგალითი", — განაცხადა პრეზიდენტმა.

თავისუფლების მოედანზე 26 მაისის აღსანიშნავი ღონისძიებები იმართება. პრეზიდენტის გარდა ღონისძიებაზე სიტყვით გამოვლენ პრემიერმინისტრი, პარლამენტის თავმჯდომარე, თავდაცვის მინისტრი და მოწვეული სტუმრები, მათ შორის, პოლონეთის პრეზიდენტი, ანდჟეი დუდა.

მოგვიანებით დაგეგმილია პირველი რესპუბლიკის მთავარსარდლის, გიორგი კვინიტაძის გამოსვენება სამების ტაძრიდან და მთაწმინდის პანთეონში დაკრძალვა.

1918 წლის 26 მაისს პირველმა რესპუბლიკამ საქართველოს დამოუკიდებლობა გამოაცხადა. 3 წლის შემდეგ, 1921 წლის 25 თებერვალს საბჭოთა არმიამ საქართველოს ოკუპაცია მოახდინა და 70 წლით იბატონა, თუმცა 1991 წლის, 9 აპრილს საქართველო პირველი რესპუბლიკის დამოუკიდებლობის აქტის საფუძველზე ისევ გათავისუფლდა რუსეთისგან. დამოუკიდებლობის აღდგენიდან 30 წელი გავიდა, დღემდე სიმბოლურად 1918 წლის 26 მაისი მიიჩნევა საქართველოს დამოუკიდებლობის დღედ.