ვენესუელაში მაშველმა ძაღლმა, სახელად ცუნამიმ, მიწისძვრის ნანგრევებიდან სულ მცირე 13 ადამიანი იხსნა. 9 წლის ბორდერ-კოლისთვის ეს ბოლო მისია იყო — ამ ოპერაციის შემდეგ ის დამსახურებულ პენსიაზე გადის.

ვენესუელაში 39 წამის ინტერვალით მომხდარი 7.2 და 7.5 მაგნიტუდის მქონე მიწისძვრების შედეგად 250-ზე მეტი შენობა დაინგრა, ტრაგედიას კი 1700-ზე მეტი ადამიანი ემსხვერპლა.

ფოტო: Getty Images

ცუნამიმ მახვილი ყნოსვის წყალობით ნანგრევებში გადარჩენილი ადამიანები იპოვა და მაშველებს მათი ზუსტი ადგილმდებარეობა მიანიშნა, რის შემდეგაც გუნდმა ნანგრევებიდან ხალხის ამოყვანა შეძლო.

ცუნამის მიერ გადარჩენილებს შორის არის 60 წლის მამაკაციც, რომელიც ნანგრევებში დაახლოებით ექვსი დღის განმავლობაში იყო გაჭედილი. ძაღლს მანამდეც არაერთი სტიქიური უბედურების დროს უმუშავია: თურქეთსა და სირიაში მომხდარი მიწისძვრები, ვენესუელის წყალდიდობა და მეწყერი.

ფოტო: Telegraph

ლეკვობისას ცუნამი კარაკასში მიტოვებული, ნაცემი და გამოფიტული იპოვეს. ძაღლი ანიტა ვიდალმა გადაარჩინა, მოგვიანებით კი სამაშველო სამსახურის სპეციალისტმა, ხორხე ბეენსმა მისი განსაკუთრებული ენერგია, ინტელექტი და სისწრაფე შენიშნა. K-SAR ECID-ის სპეციალიზებულ სასწავლო ცენტრში მიღების შემდეგ, ბორდერ-კოლიმ მრავალწლიანი ინტენსიური წვრთნა გაიარა.

ფოტო: Getty Images

ვენესუელის მიწისძვრის გმირული მისიის შემდეგ ძაღლი ვეტერინარმა გასინჯა და აღნიშნა, რომ ცუნამი ფიზიკურად გადაიღალა. სამედიცინო მეთვალყურეობისა და გადასხმების შემდეგ მისი ჯანმრთელობის მდგომარეობა დასტაბილურდა, თუმცა დადასტურდა, რომ ეს მიწისძვრა მისი ბოლო მისია იყო და ძაღლი მუშაობას აღარ გააგრძელებს.

ვენესუელაში ადგილობრივ გუნდებთან ერთად გაერთიანებული სამეფოს 6 სამაშველო ძაღლიც მუშაობს.