შინაგან საქმეთა სამინისტრომ კუსტარულად მოწყობილი ნარკოლაბორატორია გამოავლინა. სამართალდამცველებმა განსაკუთრებით დიდი ოდენობით ნარკოტიკული საშუალებები ამოიღეს და დანაშაულში ბრალდებული 4 პირი დააკავეს.

უწყების ინფორმაციით, გამოძიებით დგინდება, რომ ბრალდებულები ნარკოტიკულ საშუალებებს სპეციალურ ლაბორატორიაში, სხვადასხვა ქიმიური ნივთიერებებისა და პრეკურსორების გამოყენებით, შემდგომი რეალიზაციის მიზნით ამზადებდნენ. ჩხრეკის შედეგად ამოღებულია როგორც გამზადებული ნარკოტიკული ნივთიერებები, ისე სარეალიზაციო დაფასოებისთვის საჭირო მასალები და სავარაუდოდ, დანაშაულებრივი გზით მიღებული ფული.

გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს

"შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, ჩატარებული საპოლიციო ღონისძიებების შედეგად, კუსტარული ნარკოლაბორატორია აღმოაჩინეს, განსაკუთრებით დიდი ოდენობით ნარკოტიკული საშუალებები ამოიღეს და 4 პირი დააკავეს.

სამართალდამცველების მიერ, სხვადასხვა სისხლის სამართლის საქმეზე ჩატარებული გამოძიებით დგინდება, რომ ბრალდებულები შემდგომი რეალიზაციის მიზნით, ე.წ. ნარკოლაბორატორიაში, სხვადასხვა ქიმიური ნივთიერებებისა და პრეკურსორების გამოყენებით, ნარკოტიკულ საშუალებებს ამზადებდნენ.

სამართალდამცველებმა ბრალდებულების პირადი, საცხოვრებელი სახლებისა და ავტომობილის ჩხრეკისას, ასევე, მათ მიერ მითითებული ადგილებიდან ნივთმტკიცებად ამოიღეს სარეალიზაციოდ გამზადებული განსაკუთრებით დიდი ოდენობით ნარკოტიკული საშუალებები, მათ შორის: 41 ლიტრი "ალფა პვპ"-ს შემცველი სითხე, 5 კილოგრამამდე "მეფედრონი" , ასევე, 5 ლიტრი "მეფედრონი"-ს შემცველი სითხე და 2 კილოგრამამდე "ალფა პვპ".

ჩატარებული საგამოძიებო მოქმედებების შედეგად, პოლიციის მიერ, ასევე, ამოღებულია ნარკოტიკული საშუალების დაფასოებისათვის საჭირო მასალები და სავარაუდოდ, ნარკოტიკების რეალიზაციის შედეგად მიღებული თანხა.

საქართველოს შინაგან საქმეთა სამინისტროს თანამშრომლები აგრძელებენ შესაბამის საგამოძიებო მოქმედებებს, დანაშაულში ჩართული სხვა პირების იდენტიფიცირებისა და მათი სისხლისსამართლებრივ პასუხისგებაში მიცემის მიზნით.

გამოძიება სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს",— აღნიშნულია უწყების განცხადებაში.

შსს-ს ცნობით, ოპერატიულ-საგამოძიებო მოქმედებები გრძელდება საქმესთან შემხებლობაში მყოფი სხვა პირების დადგენისა და დაკავების მიზნით.