25 ივნისს ლუქსემბურგში გამართულ ევროკავშირის შეხვედრაზე შვედეთის კლიმატის მინისტრი, რომინა პურმოხტარი, 3 თვის შვილთან, ადამთან ერთად მივიდა.

ევროკავშირის საბჭოს წარმომადგენლების განცხადებით, ეს მათ პრაქტიკაში მინისტრთა სხდომაზე ჩვილის დასწრების პირველი შემთხვევაა.

რომინას თქმით, მას სურდა, რომ ამ ქმედებით დეკრეტული შვებულების პოლიტიკის მნიშვნელობისთვის გაესვა ხაზი.

მინდოდა მეჩვენებინა, რომ ქალს კარიერასა და ოჯახს შორის არჩევანის გაკეთება არ უნდა უწევდეს. თუმცა, ამისთვის, რა თქმა უნდა, გვერდით პროგრესულად მოაზროვნე პარტნიორია საჭირო, რომელიც მუდამ მზად იქნება, გვერდში დაგიდგეს.

შვედეთის კლიმატის მინისტრი, რომინა პურმოხტარი.

30 წლის რომინა პურმოხტარი, რომელიც 2022 წელს შვედეთის ისტორიაში ყველაზე ახალგაზრდა მინისტრი გახდა, სამსახურს ახლახან, დეკრეტული შვებულების დასრულების შემდეგ დაუბრუნდა.

ფოტო: Reuters / Kate Abnett

აღსანიშნავია, რომ შვედეთში მშობლებს ჯამში 16-თვიანი ანაზღაურებადი შვებულების აღება შეუძლიათ. 16 თვიდან 3-3 თვე ინდივიდუალურად თითოეული მშობლისთვისაა განკუთვნილი და მათი მხოლოდ ერთ მშობელზე გადაცემა არ შეიძლება — წინააღმდეგ შემთხვევაში, ეს დღეები უბრალოდ დაიკარგება. ამ წესს ხშირად "მამის თვეებს" უწოდებენ, რადგან ის სპეციალურად მამების წასახალისებლად შემოიღეს, რომ შვილებთან მეტი დრო გაატარონ