ჩინეთის ქალაქ შენჯენში 291-მეტრიანმა ცათამბჯენმა მოულოდნელად ქანაობა დაიწყო. ჩინეთის სოციალურ მედიაში გავრცელებულ ვიდეოებში ჩანს, როგორ გამორბის ხალხი შენობიდან და მიმდებარე ტერიტორიიდან.

შენობის არამყარობის მიზეზი უცნობია. რეგიონში მიწისძვრა ან უამინდობა არ დაფიქსირებულა.

შენჯენის პლაზამ მოძრაობა ადგილობრივი დროით 12:30-ზე დაიწყო, რა დროსაც შენობაში 15 ათასამდე ადამიანი იყო. ევაკუაციას ჯამში საათნახევარი დასჭირდა.

სამართალდამცავები მომხდარს იძიებენ, თუმცა აცხადებენ, რომ შენობა უსაფრთხოა და შიგნით საეჭვო გარემოებები არ აღმოუჩენიათ. შენობა 20 წლისაა და მასში ოფისები, სხვადასხვა ტექკომპანიები და მაღაზიებია განთავსებული. 72-სართულიანი პლაზა ჩინეთის ცათამბჯენებს შორის სიმაღლით 104-ე ადგილზეა.