ადამიანის უფლებათა ევროპულმა სასამართლომ ნაციონალური მოძრაობის თავმჯდომარის, ნიკა მელიას დაკავების საქმეზე საქართველოს ხელისუფლებას კითხვები გაუგზავნა. ინფორმაცია ამის შესახებ On.ge-ს ადვოკატმა, დიმიტრი საძაგლიშვილმა დაუდასტურა.

"დამიანის უფლებათა ევროპულმა სასამართლომ მოახდინა კომუნიცირება, კითხვები გაუგზავნა საქართველოს მთავრობას. მნიშვნელოვანია, რომ კითხვები დასმული იქნა ყველა იმ არსებით საკითხზე, რაზეც საჩივარში გავამახვილეთ ყურადღება. აგრეთვე მნიშვნელოვანია სასამართლოს გადაწყვეტილებები, რომელიც ნახსენებია ამ კითხვებში — ესაა ტიმოშენკო უკრაინის წიააღმდეგ და ნავალნი რუსეთის წინააღმდეგ. ადამიანის უფლებათა სასამართლომ კითხვები დასვა მე-18 მუხლის შესაძლო დარღვევასთან დაკავშირებით. ამ მუხლის არსი მდგომარეობის არალეგიტიმური მიზნებისთვის მართლმსაჯულების გამოყენებაში", — აღნიშნა საძაგლიშვილმა.

ნიკა მელია საქართველოს მთავრობას ადამიანის უფლებათა ევროპული კონვენციის ორი მუხლის დარღვევაში ედავება:

• მე-5 მუხლი — თავისუფლებისა და უსაფრთხოების უფლება;
• მე-18 მუხლი — უფლებების შეზღუდვათა გამოყენების ფარგლები.

იუსტიციის სამინისტრო სტრასბურგის სასამართლოში მიმდინარე მიხეილ სააკაშვილის, ნიკა მელიასა და გიგი უგულავას საქმეებს გამოეხმაურა. როგორც სამინისტროში ამბობენ, სამივე საქმე განხილვის საწყის ეტაპზეა და ახლა იწყება მხარეების მიერ პოზიციებისა და მტკიცებულებების წარდგენა.

"საქართველოს მთავრობას სამივე საქმეზე აქვს მყარი არგუმენტები, რომლებსაც ევროპულ სასამართლოში წარადგენს. სამივე მომჩივნის საქმეს — სააკაშვილი, მელია და უგულავა საქართველოს წინააღმდეგ — სტრასბურგის სასამართლო სტანდარტული პროცედურით განიხილავს, რაც ნიშნავს იმას, რომ სასამართლო მომჩივნებისგან და საქართველოს მთავრობისგან მიიღებს 2-2 წერილობით პოზიციას მტკიცებულებებთან ერთად და ამის საფუძველზე გადაწყვეტილებას გამოიტანს. მხარეების მიერ პოზიციების გაცვლას და სასამართლოს მიერ გადაწყვეტილების მიღებას, სულ მცირე, 2 წელი დასჭირდება", — აღნიშნულია იუსტიციის სამინისტროს განცხადებაში.

სამინისტროს განმარტებით, მიხეილ სააკაშვილი მიიჩნევს, რომ სანდრო გირგვლიანის მკვლელების შეწყალების გამო მის მიმართ დამდგარი განაჩენი ევროპულ კონვენციას ეწინააღმდეგება. აგრეთვე მიიჩნევს, რომ ევროპულ კონვენციასთან შეუსაბამოა საქართველოს სამი ინსტანციის სასამართლოების გადაწყვეტილებები, რომ 2005 წლის 14 ივლისს პარლამენტის წევრის, ვალერი გელაშვილის, სასტიკი ცემა მისი პირადი დავალებით განხორციელდა, რის გამოც მას მიესაჯა 6 წლით თავისუფლების აღკვეთა.

რაც შეეხება უგულავა, ის დავობს საქართველოში მის მიმართ დასრულებულ და მიმდინარე ყველა სისხლის სამართლის საქმეზე: 1) ე.წ. თბილისის განვითარების ფონდის ეპიზოდი, რომლის ფარგლებში უგულავა მსჯავრდებულია სახელმწიფო ქონების დიდი ოდენობით მითვისება-გაფლანგვის საქმეზე; 2) ე.წ. რიყის ეპიზოდი; 3) ე.წ. თბილსერვისჯგუფის ეპიზოდი, რომლის ფარგლებშიც უგულავა მსჯავრდებულია უფლებამოსილების გადამეტების საქმეზე; 4) 2019 წლის 11 დეკემბერს თბილისის აეროპორტში მომხდარი ინციდენტი, რომლის ფარგლებშიც უგულავა ბრალდებულია ძალადობის მუხლით.