აშშ-ს 45-ე პრეზიდენტმა, დონალდ ტრამპმა ახალი ვებგვერდი donaldjtrump.com შექმნა, სადაც საკუთარ განცხადებებს, ფოტოებსა და ვიდეოებს გაავრცელებს. ვებგვერდის მარცხენა ზედა კუთხეში სლოგანი "Save America" (გადაარჩინე ამერიკა). სურვილის შემთხვევაში, შესაძლებელია დონაციის გაკეთება.

ვებგვერდის განყოფილებაში From the Desk of Donald J. Trump (დონალდ ტრამპის მაგიდიდან) რამდენიმე განცხადება უკვე გამოქვეყნებულია, რომელთაგანაც ყველაზე ძველი 24 მარტით თარიღდება. თუმცაღა ვებგვერდი ხელმისაწვდომი მხოლოდ 4 მაისს გახდა.

მომხმარებლებს შეუძლიათ ტრამპის განცხადებები გააზიარონ Twitter-ზე და Facebook-ზე, თუმცა პასუხის გაცემა არ შეუძლიათ.

დონალდ ტრამპმა საკუთარი პლატფორმის შექმნა მას შემდეგ გადაწყვიტა, რაც ის არაერთ სოციალურ ქსელში, მათ შორის Facebook-ზე, Twitter-ზე, YouTube-სა და Instagram-ზე დაბლოკეს. ამის მიზეზი კი კაპიტოლიუმზე მისი მხარდამჭერების თავდასხმისას გაკეთებული განცხადებები გახდა.