უამრავი ადამიანისთვის აღდგომის დღესასწაული და სააღდგომო სუფრა პასკის გარეშე წარმოუდგენელია. მის სახელზე ხშირად მსჯელობენ: ხან ხატის პურს ეძახიან, ხან არტოსს, ხან — სააღდგომო კულიჩს. სხვადასხვა სახელისა თუ მათი დატვირთვის მიუხედავად, გადავწყვიტეთ, რომ ამ სტატიაში პასკას უბრალოდ პასკა დავუძახოთ!

ქიშმიშიანი თუ უქიშმიშო, შოკოლადით, ცუკატებითა და სხვა ნუგბარით გაფორმებული გემრიელი პასკის შეძენა სააღდგომო სამზადისის განუყოფელი ნაწილია. თუმცა არც იმ ადამიანებს აქვთ ცოტა საქმე, რომელთაც პასკის სახლში გამოცხობა ურჩევნიათ — წინასააღდგომოდ ისინი მუდამ კარგად გამოცდილი თუ ახალი რეცეპტების ძიებაში არიან.

ჩვენს მკითხველებს, რომელთაც საკუთარი კულინარიული შესაძლებლობების გამოცდა და პასკის სახლში გამოცხობა სურთ, საკონდიტრო CheeseCaker • ჩიზქეიქერი უგემრიელესი პასკის რეცეპტს სთავაზობს. თუ გსურთ, წინასააღდგომოდ თქვენი სახლი მადისაღმძვრელი სურნელით აივსოს, მოიმარაგეთ საჭირო ინგრედიენტები და ენთუზიაზმი!

პასკის მოსამზადებლად შემდეგი ინგრედიენტები დაგჭირდებათ:

• 850 გ ფქვილი (უმაღლესი ხარისხის, გაცრილი);

• 380 გ შაქარი;

• 3 ცალი კვერცხი (0 კატეგორიის);

• 300 გ კარაქი (82%-იანი ცხიმიანობის);

• 300 გ რძე (სასურველია მაღალი ცხიმიანობის);

• 30 გ ნედლი საფუარი (ან 15 გრამი მშრალი გრანულები);

• 1 გ მარილი;

• 150 გ ქიშმიში;

• 1 ლიმონის ცედრა;

• 5 გ ვანილის ექსტრაქტი (ან ვანილის შაქარი).

მომზადების წესი:

• გაათბეთ რძე, დაამატეთ 80 გ შაქარი, 150 გ ფქვილი და საფუარი (ფქვილი და შაქარი აიღეთ საერთო რაოდენობიდან) და კარგად გახსენით ერთმანეთში. მიღებული მასა კარგად უნდა ამოვიდეს — მოცულობა თითქმის გაორმაგდეს;
• 3 კვერცხი, 300 გ დარბილებული კარაქი და 300 გ შაქარი მიქსერში ათქვიფეთ მსუბუქად, ერთგვაროვანი მასის მიღებამდე;
• გარეცხეთ ქიშმიში და გააშრეთ;
• აურიეთ ერთმანეთში ილი, ჯავზი, ვანილი, ლიმონის ცედრა და შავი რომი;
• 700 გ ფქვილი მოათავსეთ თასში. შემდეგ დაუმატეთ კვერცხის, შაქრისა და კარაქის მასა და აპარი. დაიწყეთ მოზელა. თუ ხელით ზელთ, დაახლოებით 30 წუთი დაგჭირდებათ, მიქსერის შემთხვევაში — 10-12 წუთი. მზა ცომი შეფუთეთ და ოთახის ტემპერატურაზე მის აფუებას დაელოდეთ;
• როდესაც ცომი ამოვა (მისი მოცულობა, სულ მცირე, გაორმაგდება), გადაზილეთ, დაამატეთ ქიშმიში და სუნელებისა და ალკოჰოლის ნაზავი. ცომი კიდევ ერთხელ გადაზილეთ ერთგვაროვანი მასის მიღებამდე და მის ამოსვლას დაელოდეთ;
• მას შემდეგ, რაც ცომი მეორედ ამოფუვდება, გადაზილეთ და მიღებული მასა საცხობ ფორმებში გადაიტანეთ. თითოეული ფორმა 1/3-ით უნდა შეივსოს. დაელოდეთ, სანამ ცომი ბოლომდე ამოფუვდება, შემდეგ კი წინასწარ გახურებულ ღუმელში, 150 გრადუსზე 1 საათის განმავლობაში მოათავსეთ. ცომის მზაობა შეგიძლიათ, ხის ჩხირითაც შეამოწმოთ. ცხობის დრო პასკის ზომაზეა დამოკიდებული;
• გამომცხვარ პასკას მოაფრქვიეთ შაქრის პუდრი და 24 საათის შემდეგ დააგემოვნოთ;
• აღნიშნული რეცეპტით 2 ცალი 1 კილოგრამიანი პასკის გამოცხობა შეგიძლიათ.

დამატებითი რჩევები:

• სუნელების ალკოჰოლში შეზავება და შენახვა სასურველია ცომის მომზადების დაწყებამდე, სულ მცირე, ერთი დღით ადრე;

• ცომი ძალიან კარგად ამოდის მაცივარში, 4+ გრადუსზე;

• სასურველია ქიშმიშის ნახევარი თეთრი იყოს, მეორე ნახევარი — შავი;

• საუკეთესო შედეგის მისაღებად კარგი განწყობა უმნიშვნელოვანესია!