დონალდ ტრამპის სარჩელზე ხუმრობის შემდეგ, CBS-მა მოულოდნელი განცხადება გააკეთა და თქვა, რომ სტივენ კოლბერის გვიანი შოუს დახურვას გეგმავს, მიზეზად "ფინანსური კრიზისი" დასახელდა.

"ვფიქრობთ, სტივენ კოლბერს შემცვლელი არ ჰყავს, ამიტომ 2026 წლის მაისში გადაცემას დავხურავთ", — განაცხადეს CBS-ის ხელმძღვანელებმა — "ვამაყობთ, რომ CBS სტივენის სახლად იქცა, ეს გადაწყვეტილება ფინანსური კრიზისის გამო მივიღეთ და არანაირად არის დაკავშირებული შოუს შესრულებასთან, შინაარსთან ან Paramount-ში მიმდინარე სხვა საკითხებთან".

კოლბერმა მაყურებლებს ამბავი ხუთშაბათს, გადაცემის ჩაწერისას გააცნო, გადაწყვეტილებამ სტუდიაში მყოფი მაყურებლების მხრიდან არც თუ ისე სასიამოვნო უკუკავშირი დაიმსახურა.

"მინდა გითხრათ, რომ CBS-ის თანამშრომლები შესანიშნავი ადამიანები არიან ", — თქვა კოლბერმა და დასძინა — "რა თქმა უნდა, მადლობელი ვარ თქვენი, მაყურებლების, ვინც ყოველ საღამოს გვიყურებდით და გვისმენდით".

კოლბერი — რომელმაც CBS-ის პროგრამა 2015 წელს დევიდ ლეტერმანისგან გადაიბარა — ტელევიზიაში პრეზიდენტ დონალდ ტრამპის ერთ-ერთი ყველაზე მკაცრი კრიტიკოსი გახდა.

როგორც ცნობილია, წამყვანს შოუს გაუქმების შესახებ გადაწყვეტილება ოთხშაბათს საღამოს აცნობეს.

"ეს არა მხოლოდ ჩემი შოუს დასასრული, არამედ CBS-ზე გასული გვიანი შოუს დასასრულია. მე არ შემცვლიან, შოუ უბრალოდ გაქრება", — განაცხადა წამყვანმა.

აღსანიშნავია, რომ გადაცემის დახურვის შესახებ განცხადება ზუსტად ორი კვირის შემდეგ გაკეთდა, რაც CBS-ის მშობელი კომპანია Paramount პრეზიდენტ დონალდ ტრამპთან 16 მილიონიან სარჩელზე მორიგდა, რომელიც ტრამპის 2024 წლის არჩევნებში კონკურენტ კამალა ჰარისთან CBS-ზე გასულ ინტერვიუს ეხებოდა.

დემოკრატმა სენატორმა, ადამ შიფმა, ხუთშაბათს X-ზე გამოაქვეყნა, რომ მან კოლბერთან ინტერვიუს ჩაწერა გაუქმების გამოცხადებამდე ცოტა ხნით ადრე დაასრულა.

მან ეჭვი შეიტანა, დაკავშირებული იყო თუ არა ეს განცხადება 16 მილიონი დოლარის ოდენობის კომპენსაციასთან, რომლის გადახდა ტელეარხს ტრამპის სარჩელის შემდეგ დაევალა."თუ Paramount-მა და CBS-მა გადაცემა პოლიტიკური მიზეზების გამო დახურა, საზოგადოება ამის შესახებ ინფორმირებული უნდა იყოს", — ვკითხულობთ განცხადებაში.

შეგახსენებთ, რომ ტრამპსა და Paramount-ს შორის შეთანხმება მას შემდეგ დაიდო, რაც ტრამპმა გასული წლის ოქტომბერში CBS-ს უჩივლა და განაცხადა, რომ ტელეარხმა გამიზნულად დაამონტაჟა მის საპრეზიდენტო კონკურენტ კამალა ჰარისთან ინტერვიუ, რომელიც საინფორმაციო პროგრამა 60 წუთში გავიდა, რათა "სასწორი დემოკრატიული პარტიის სასარგებლოდ გადაეხარა".

კოლბერმა, გადაცემაში მუშაობის პერიოდში, მრავალ დემოკრატ პოლიტიკოსს უმასპინძლა. გასულ თვეში მან ისაუბრა ზოჰრან მამდანისთან, დემოკრატ სოციალისტთან, რომელიც ნიუ-იორკის შემდეგი მერის არჩევნებში ლიდერობს.

ტელეარხის თქმით, გადაცემის გაუქმების გადაწყვეტილება მაშინ მიიღეს, როდესაც გაანალიზეს, რომ ტელეარხებს უჭირთ ახალგაზრდა მაყურებლების მოზიდვა ონლაინ სტრიმერების, პოდკასტების კონკურენციისა და პირდაპირი ეთერის ფასების ზრდის ფონზე.

ჯერჯერობით უცნობია, რომელი გადაცემა ჩაანაცვლებს გვიან ღამეს. გადაცემის ბოლო ეპიზოდს მაყურებელი 2026 წლის მაისში, მომდევნო სეზონის დასრულების შემდეგ, იხილავს.