თავისუფლად შეიძლება ითქვას, რომ ლოგო ბრენდის სავიზიტო ბარათია. კარგ ლოგოს შეუძლია, მარკეტინგული კამპანიის ნახევარი შეასრულოს და მომხმარებლებს იმდენად დაამახსოვროს თავი, რომ მასზე ერთხელ შეხედვაც კი ყველაფერს ამბობდეს კომპანიაზე.

რა იქნებოდა, ასეთივე დასამახსოვრებელი და ნაცნობი რომ ყოფილიყო ის საზოგადოებრივი ღირებულებები, რომელთათვისაც ბევრი ადამიანი იბრძვის — სწორედ ეს იდეა იქცა შთაგონების წყაროდ ლიდია კემბრონისთვის, ნიუიორკელი დიზაინერისთვის.

საკუთარ იდეას მან მალევე შეასხა სხეული და ცნობილი ბრენდების ლოგოები სხვაგვარად წარმოაჩინა, მათი საშუალებით კი საპროტესტო გზავნილებს ახალი ფორმა მისცა.

1. ტაიდი — "პრაიდი"

ფოტო: lydiacambron / Instagram

სარეცხი საშუალების სახეცვლილ ლოგოზე ბრენდის სახელის ერთგვარი ომონიმია დატანილი, რომელიც ინგლისურად "სიამაყეს" აღნიშნავს და გამოიყენება ლგბტქ+ ადამიანების მხარდასაჭერად გზავნილად.

2. Costco — "ანტირასიზმის ერთგული"

ფოტო: lydiacambron / Instagr

რასიზმთან ბრძოლა და მოძრაობა "შავკანიანთა სიცოცხლე მნიშვნელოვანია" ის თემებია, რომლებიც ყველაზე მეტად იქცევს დიზაინერის ყურადღებას. ცნობილი ამერიკული სავაჭრო კომპანიის ლოგოს გარდასაქმნელად სწორედ ეს თემა შეირჩა.

3. გუდიარი — "ძალიან ქვიარი"

ფოტო: lydiacambron / Instagram

საბურავების მწარმოებელი კომპანიის სახეცვლილი ლოგო ქვიარ ადამიანების მხარდაჭერის კიდევ ერთი გზავნილია.

4. Hershey's — "Her/She: გამოიყენეთ სწორი ნაცვალსახელები"

ფოტო: lydiacambron / Instagram

შოკოლადის ფილის შეფუთვაზე იმ ადამიანების მხარდამჭერი გზავნილია გამოსახული, ვინც საკუთარი იდენტობის გამო, საზოგადოების მიერ მათთვის განსაზღვრულ ნაცვალსახელებთან თავს არაკომფორტულად გრძნობს.

5. ვანს — "ტრანს"

ფოტო: lydiacambron / Instagram

ახალგაზრდების საყვარელი ფეხსაცმლის ბრენდის გარდაქმნილი ლოგო ტრანსფობიის პრობლემაზე უსვამს ხაზს. ტრანსგენდერი ადამიანების დროშის ფერებშია გადაწყვეტილი ილუსტრაციის კუბიკებით გაფორმებაც..

6. დისნეი — "შეწყდეს დაფინანსება"

ფოტო: lydiacambron / Instagram

ორივე სიტყვა ინგლისურად "დ"-ზე იწყება და დიზაინერმაც ალბათ ამიტომ გადაწყვიტა კინოკომპანიის ლოგოს გამოყენება კიდევ ერთი გზავნილისთვის. კამპანია Defund, იგივე "შეწყდეს დაფინანსება", პოლიციისთვის ფულის გადახდას ეწინააღმდეგება და მოითხოვს, რომ იგი უფრო სასარგებლო საქმიანობას მოხმარდეს. მოძრაობა განსაკუთრებით გააქტიურდა გასულ წელს, როცა აშშ-ში ჯორჯ ფლოიდის მკვლელობაზე პასუხისმგებელი პოლიციელი აღმოჩნდა.

7. Prudential Financial — "მოხდეს სიღარიბის დეკრიმინალიზაცია"

ფოტო: lydiacambron / Instagram

ამერიკული ფინანსური კომპანიის გარდაქმნილი ლოგო საზოგადოების მატერიალურ პრობლემებს ეხმაურება. მაშინ, როცა პანდემიის გამო ეკონომიკის არაერთი მიმართულება დაზარალდა, უმუშევრობა და არასაკმარისი შემოსავალი კიდევ ერთ დიდ გამოწვევად იქცა.

8. Domino's Pizza — "გააუქმე საპატიმრო"

ფოტო: lydiacambron / Instagram

მოძრაობა "გააუქმე საპატიმრო" უკვე წლებია, არსებობს და სასჯელის ფორმების გადახედვას მოითხოვს. მოძრაობის მხარდამჭერების აზრით, საპატიმროების რაოდენობა უნდა შემცირდეს, იმ ადამიანებისთვის კი, ვისთვისაც საპატიმროა განკუთვნილი, რეაბილიტაციის პროგრამები უნდა შემუშავდეს, რათა დანაშაულის პრევენცია ამ გზით მოხდეს და არა — დასჯით.

9. Amazon — "გაუქმების დროა"

ფოტო: lydiacambron / Instagram

ზემოხსენებულ გზავნილს გამოხატავს ცნობილი ამერიკული ონლაინსავაჭრო პლატფორმის სახეცვლილი ლოგოც, რომელსაც, სხვათა შორის, საინტერესო ისტორია და მნიშვნელობა აქვს.