იუსტიციის სამინისტროს საჯარო რეესტრის ეროვნული სააგენტო ეროვნული სანავიგაციო სისტემის შექმნის პროექტს იწყებს. პროექტის პირველ ეტაპზე საველე-აღწერითი სამუშაოები ბათუმში დაიწყება.

საჯარო რეესტრი მიღებულ გეოგრაფიულ მონაცემებს საერთაშორისო სტანდარტების შესაბამისად დაამუშავებს და ეროვნული სანავიგაციო სისტემის შესაქმნელად გამოიყენებს. ამას გარდა, სააგენტო ინფორმაციას მსოფლიო ლიდერ სანავიგაციო კომპანიებსაც (Google, Tomtom) მიაწვდის, რომლებიც მონაცემებს თავიანთ პროდუქტებში - ელექტრონული რუკების მობილურ და ვებ აპლიკაციებში, ავტომობილების ბორტკომპიუტერებში და სხვა სანავიგაციო სისტემებში ასახავენ.

საჯარო რეესტრის საველე ოპერატორები ბათუმში სრულად აღწერენ საზოგადოებრივი მნიშვნელობის ყველა გეოგრაფიულ მონაცემს, მათ შორის:

  • ტრანსპორტის მარშრუტებს;
  • საგზაო მოძრაობის მარეგულირებელ ნიშნებს;
  • გადასასვლელებს;
  • ველო ტერმინალებს;
  • ბენზინგასამართ სადგურებს;
  • ადმინისტრაციულ შენობებს;
  • ბანკებსა და ბანკომატებს;
  • სასტუმრო ობიექტებს;
  • სპორტულ ობიექტებს;
  • გასართობ ობიექტებს;
  • კვების ობიექტებს;
  • კულტურულ ობიექტებს;
  • რეკრეაციულ ობიექტებს;
  • ტურისტული თვალსაზრისით მნიშვნელოვან სხვა ობიექტებს.

რეესტრის ცნობით, აღწერილი მონაცემების ვიზუალიზაციისთვის თანდართული იქნება შესაბამისი ფოტომასალა. ეროვნული სანავიგაციო სისტემა ნებისმიერ მომხმარებელს ინფორმაციის მოძიებას, ადგილმდებარეობის იდენტიფიცირებას და დანიშნულების ადგილამდე მისასვლელი ოპტიმალური მარშრუტის შერჩევას გაუადვილებს.

საველე-საინვენტარიზაციო სამუშაოებს საჯარო რეესტრი ბათუმის მერიასთან თანამშრომლობით ახორციელებს.

საჯარო რეესტრი იმედოვნებს, რომ პროექტი ხელს შეუწყობს ქვეყნის პოპულარიზაციას, ეკონომიკური პოტენციალის გაუმჯობესებას, ინფრასტრუქტურისა და ქვეყანაში ტურიზმის განვითარებას.

ბათუმის შემდეგ პროექტის განხორციელება თბილისშიც იგეგმება.