უკვე შვიდი წელია, რაც 6 აპრილს გაეროს ეგიდით აღინიშნება "სპორტი განვითარებისა და მშვიდობისთვის" მსოფლიო დღე (IDSDP).

ICA-ის ინიციატივით, წელს ამ კამპანიას ქართველი სპორტსმენებიც შეუერთდნენ.

სპორტის სხვადასხვა სფეროს წარმომადგენლები კამპანიის ფარგლებში შექმნილ ვიდეოში გამოჩნდნენ და საკუთარი გზავნილები გააჟღერეს. მოკლე გზავნილები ეხება სპორტის, როგორც მშვიდობისა და მდგრადი განვითარების მხარდამჭერი სფეროს როლს საზოგადოებრივ ცხოვრებაში.

"ბარიერების გარღვევა", "ერთიანობა და ინსპირაცია", "უსაზღვრო შესაძლებლობები" და "სამყაროს უკეთესობისკენ შეცვლის ძალა" — ეს ის ძირითადი აქცენტებია, რომლებზეც ქართველმა სპორტსმენებმ ყურადღება გაამახვილეს.

ვიდეოსთან ერთად კამპანიისთვის შეიქმნა საიმიჯო ფოტოებიც, სადაც ქართველი სპორტსმენები მშვიდობის ერთგვარ სიმბოლოსთან — ქაღალდის თვითმფრინავთან — ერთად არიან გამოსახულნი. ფოტოების ნახვა ICA-ის ვებგვერდზე შეგიძლიათ.

კამპანიაში ჩართული სპორტსმენები არიან მორაგბე სოსო მათიაშვილი, მოჭიდავე ლადო ხინჩეგაშვილი, კალათბურთელი ანატოლი ბოისა, პარამოფარიკავე ირმა ხეცურიანი, წყალბურთელი მიშა ბაღათურია, ტანმოვარჯიშე ქეთი ხატიაშვილი, ფრენბურთელი ლიზა ლობჟანიძე, მხედარი ოთო კუჭავა, კარატისტი ნათია ფრუიძე, მოცურავე ნანა ნებიერიძე და ფეხბურთელი ნათია დანელია.

როგორც ღონისძიების ორგანიზატორები აღნიშნავენ, ფოტო და ვიდეოკამპანიის მიზანი, სპორტის და მშვიდობის იდეის პოპულარიზაციასთან ერთად, არის მოწოდება სხვა სპორტსმენებისა და ამ სფეროს გულშემატკივრებისთვის, რომ შეუერთდნენ ინიციატივას.

გაეროს გენერალურმა ასამბლეამ საერთაშორისო ოლიმპიურ კომიტეტთან ერთად 2013 წლის აგვისტოში "სპორტი განვითარებისა და მშვიდობისთვის" მსოფლიო დღე დააწესა. ეს დღე პირველად 2014 წელს აღინიშნა, თარიღი კი სიმბოლურია — პირველი თანამედროვე ოლიმპიური თამაშები 1896 წელს სწორედ 6 აპრილს დაიწყო.

წელს ეს ღონისძიება განსაკუთრებული დატვირთვისაა; "მხოლოდ ერთად შეგვიძლია, ვითამაშოთ და ვიზეიმოთ კვლავ" — ასეთი გზავნილი აქვს გაეროს მიერ დაწესებულ დღეს 2021 წელს, როცა კორონავირუსის პანდემიის გამო სპორტული ღონისძიებების ტრადიციული ფორმით ჩატარება კვლავ შეუძლებელია.

ვირტუალური კამპანიის ფარგლებში თქვენ შეგიძლიათ სოციალურ მედიაში გამოაქვეყნოთ ფოტო ან ვიდეო, რომლითაც ახსნით, რა როლი აქვს სპორტს თქვენს ცხოვრებაში. ორგანიზატორები გთხოვენ, საჯაროდ გამოქვეყნებული პოსტის აღწერაში გამოიყენოთ ჰეშტეგები #OnlyTogether და #SportDay.

აღსანიშნავია, რომ რიგით 32-ე ზაფხულის ოლიმპიური თამაშები, რომელიც, წესით, 2020 წელს უნდა ჩატარებულიყო, თავისი არსებობის ისტორიაში პირველად გადაიდო პანდემიის გამო, ამიტომ მასშტაბური სპორტული ღონისძიება წელს გაიმართება. ოლიმპიადას, რომელიც 23 ივლისს გაიხსნება, ტოკიო უმასპინძლებს და მასში, დაახლოებით, 11 ათასი სპორტსმენი მიიღებს მონაწილეობას.