საქსტატის წინასწარი შეფასებით, საქართველოს ეკონომიკა ვარდნას განაგრძობს. ოფიციალური სტატისტიკის მიხედვით, თებერვალში, გასული წლის შესაბამის თვესთან შედარებით, ქვეყნის მთლიანი შიდა პროდუქტი 5,1%-ით შემცირდა, ხოლო მიმდინარე წლის ორი თვის მდგომარეობით, 8,3%-იანი ვარდნა დაფიქსირდა.

უწყების მიერ გამოქვეყნებულ ანგარიშში ვკითხულობთ, რომ ეკონომიკა შემცირდა შემდეგ სექტორებში: მშენებლობა, განთავსების საშუალებით უზრუნველყოფა, ხელოვნება, გართობა და დასვენება, ტრანსპორტი და დასაწყობება, უძრავ ქონებასთან დაკავშირებული საქმიანობები და დამამუშავებელი მრეწველობა. რაც შეეხება მატებას, ეკონომიკა გაიზარდა საფინანსო და სადაზღვევო საქმიანობების, ვაჭრობის, წყალმომარაგების, კანალიზაციისა და ნარჩენების მართვის სექტორებში.

ეკონომიკის ზრდის წინასწარი შეფასება დღგ-ს გადამხდელ საწარმოთა ბრუნვას ეფუძნება. საქსტატის ინფორმაციით, თერბერვალში ახლადრეგისტრირებული საწარმოთა რაოდენობა 12,4%-ით გაიზარდა და 4 463 შეადგინა. 7,6%-ით არის გაზრდილი დამატებითი ღირებულების გადამხდელ საწარმოთა ბრუნვის მოცულობა და თებერვლის მდგომარეობით, 6,9 მლრდ ლარს უტოლდება.

ეკონომიკის ვარდნაზე გავლენა მოახდინა საგარეო ვაჭრობის მონაცემებმაც. იანვარ-თებერვალში, გასული წლის შესაბამის პერიოდთან შედარებით, ექსპორტის მოცულობა (494,7 მლნ დოლარი) 6,8%-ით, ხოლო იმპორტირებული საქონლის რაოდენობა (1,2 მლრდ დოლარი) 14,1%-ით შემცირდა. შესაბამისად, საგარეო სავაჭრო ბრუნვა (ექსპორტისა და იმპორტის ჯამი) 1,7 მლრდ დოლარს გაუტოლდა (კლება 12%).

საქსტატის ანგარიშში ინფლაციის შესახებაც არის საუბარი. უწყების ინფორმაციით, თებერვალში გასული წლის იგივე თვესთან შედარებით, ფასები 3,6%-ით, ხოლო მიმდინარე წლის იანვართან შედარებით 1,1%-ით გაიზარდა.

საქართველოს ეკონომიკის შემცირება გასული წლის მარტიდან დაიწყო, რაც კორონავირუსით გამოწვეული პანდემიის ფონზე მიღებულ შეზღუდვებს უკავშირდებოდა. ეკონომიკის ვარდნის ტენდენცია გაგრძელდა მომდევნო თვეებშიც. ბოლო გათვლების მიხედვით, 2020 წლის მეორე კვარტალში ქვეყნის მშპ 13,2%-ით, მესამე კვარტალში - 5,6%-ით, ხოლო მეოთხე კვარტალში 6,8%-ით შემცირდა. წლიურად, 2020-ში საქართველოს ეკონომიკამ 6,2%-ით იკლო, ხოლო მიმდინარე წლის იანვარში GDP-ს 11,5%-იანი ვარდნა დაფიქსირდა.