საქართველოში ამერიკის ელჩის, კელი დეგნანის თქმით, ის, რომ პოლიტიკური მხარეები საერთაშორისო ანგარიშებიდან იმას "იღებენ", რისი მოსმენაც უნდათ, ეს ხელიდან გაშვებული შესაძლებლობა იქნება. ამის შესახებ მან საზოგადოებრივ მაუწყებელთან ინტერვიუში ისაუბრა.

"რაც არ არის სწორი არის ის, რომ საერთაშორისო ორგანიზაციების ანგარიშებიდან თუ გამოკითხვებიდან იმ ინფორმაციის ამოწევა ხდება, რაც მხოლოდ ერთ ან მეორე მხარეს სურს. სწორედ ამიტომ, ხშირად გამოკითხულებს პასუხი არ აქვთ, არ იციან, დაბნეულები არიან. არ არის სასარგებლო მხოლოდ ის მოისმინო, რისი მოსმენაც გსურს. ეს ანგარიშები, გამოკითხვები დახმარებისთვის არის და არა კრიტიკისთვის. ეს არის ის ინფორმაცია, რაც საქართველოს ლიდერებს სჭირდებათ, რომ გააუმჯობესონ ქვეყნის სისტემები. ამ ანგარიშებს ძალიან დიდი ყურადღებით ადგენენ, რომ იყოს კონსტრუქციული და ასევე ინფორმატიული. როდესაც ერთი ან მეორე მხარე იღებს იმას, რისი გაგონებაც სურს და არ წარმოადგენს დაბალანსებულად, ან არ მოისმენს დაბალანსებულ ინფორმაციას, ეს ხელიდან გაშვებული შესაძლებლობაა", — განაცხადა დეგნანმა.

22 მარტს შარლ მიშელმა განაცხადა, რომ დანიელსონი საქართველოში მედიაციის გასაგრძელებლად დაბრუნდებოდა. მისი თქმით, საქართველოს მოქალაქეების ინტერესებისთვის, კომპრომისებზე წასლის დროა. დანიელსონის ბოლო ვიზიტის დროს, ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.