სასჯელაღსრულების დაწესებულების ექთანს, რომელმაც AstraZeneca-ს ვაქცინა გაიკეთა, კორონავირუსი დაუდასტურდა. ინფორმაცია ამის შესახებ On.ge-ს ინფექციურ საავადმყოფოში დაუდასტურეს.

სასჯელაღსრულების სისტემაში ამბობენ, რომ ვაქცინამდე ექთანს ტესტზე აურყოფითი პასუხი ჰქონდა, თუმცა ჯანდაცვის მინისტრი ამბობს, რომ შედეგი დადებითი იყო. NCDC-ის დირექტორის მოადგილე, პაატა იმნაძე კი ამ შემთხვევაზე საუბრისას განმარტავს, რომ ვაქცინა ვერ ასწრებს იმუნიტეტის გამომუშავებას, თუ პაციენტი ვირუსის ინკუბაციურ პერიოდშია აცრილი.

კვლევების შედეგად დადასტურებულია, რომ იმუნიტეტის გამოსამუშავებლად Oxford-AstraZeneca-ს ვაქცინის 2 დოზაა საჭირო, რომელთა შორის დროის შუალედი 4 კვირა უნდა იყოს.

როგორც პაატა იმნაძემ On.ge-ს განუცხადა, ვაქცინის პირველ დოზას იმუნიტეტის გამოსამუშავებლად 2-3 კვირა ესაჭიროება.

რას ამბობენ უწყებები

როგორც On.ge-ს სასჯელაღსრულების სისტემაში განუცხადეს, ექთანს ვაქცინის გაკეთებამდე ვირუსი არ დაუდასტურდა. ვაქცინაციიდან მეორე დღეს, კი ვირუსი მის ქმარს გამოუვლინდა, რის შემდეგაც თავადაც კიდევ ერთხელ ჩაიტარა ტესტირება და კოვიდდადებითი აღმოჩნდა.

"N5 დაწესებულების ექთანს მიმდინარე წლის 15 მარტს ჩაუტარდა PCR ტესტირება (პასუხი უარყოფითი), ხოლო 18 მარტს სწრაფი ანტიგენის ტესტით შემოწმდა (პასუხი კვლავ უარყოფითი იყო). ამავე დღეს მას გაუკეთდა აცრა covid-19-ზე. მეორე დღეს, 19 მარტს მის მეუღლეს დაუდგინდა covid-19, ხოლო თავად ექთანსაც გამოუვლინდა covid-19-ისთვის დამახასიათებელი სიმპტომები (ტემპერატურის მატება). იგი მოთავსდა სპეციალიზებულ ე.წ. კოვიდკლინიკაში, სადაც 20 მარტს დაუდასტურდა covid-19. მისი მდგომარეობა დამაკმაყოფილებელია და უახლოეს დღეებში დატოვებს კლინიკას", — აცხადებენ სასჯელაღსრულების სისტემაში.

ჯანდაცვის მინისტრმა, ეკატერინე ტიკარაძემ კი განაცხადა, რომ მედდას კორონავირუსი ვაქცინაციამდე ჰქონდა. ჟურნალისტის დაამზუსტებელ რეპლიკაზე, რომ ექთანს ვაქცინაციამდე ჩატარებულ ტესტზე უარყოფითი პასუხი ჰქონდა, მინისტრმა განაცხადა, რომ აღნიშნულ ინფორმაციას გადაამოწმებს.

"ჩემთვის ცნობილი არის, რომ მას ჰქონდა გაკეთებული PCR ტესტი და პასუხი მოუვიდა ორი დღის შემდეგ. მას შემდეგ, რაც ჩაიტარა ვაქცინაცია. თუ თქვენ სხვა ინფორმაცია გაქვთ, გადავამოწმებ.

ჩვენ ჯერჯერობით არ გვაქვს მიღებული რეკომენდაცია იმის თაობაზე, რომ ვაქცინაციამდე სავალდებულოა ტესტის ჩატარება. შესაბამისად, ჩვენი მედ-პერსონალი მიყვება იმ დადგენილ სტანდარტებს, რაც გვაქვს მსოფლიო ჯანდაცვის ორგანიზაციიდან", — განაცხადა ტიკარაძემ.

ვაქცინის გაკეთების შემდეგ ვირუსის დადასტურებამ საზოგადოებაში დამატებითი კითხვები გააჩინა მის ეფექტურობაზე. როგორც On.ge-ს პაატა იმნაძემ განუმარტა, თუ პაციენტი ვირუსის ინკუბაციურ პერიოდში აიცრა და ინფიცირება ვაქცინის გაკეთების შემდეგ გამოვლინდა, ეს არ ნიშნავს, რომ რამე პრობლემა არსებობს.

"ინკუბაციურ პერიოდში თუ ვინმე აიცრა, და მერე გამოვლინდა, არავითარი სამედიცინო პრობლემა არ არის. ანუ, ვაქცინა ვერ ასწრებს იმუნიტეტის გამომუშავებას", — განაცხადა მან.

On.ge დაუკავშირდა ინფექციურ საავადმყოფოსაც, სადაც განაცხადეს, რომ ექთანი თავს კარგად გრძნობს და მას მხოლოდ ვირუსის საერთო მახასიათებელი, ზოგადი სისუსტე აღენიშნება.

"სამედიცინო მუშაკია, კვირას შემოიყვანეს, ტემპერატურა აღარ აქვს, ანალიზები ნორმაშია ყველაფერი, საერთო სისუსტე აქვს, რაც დამახასიათებელია კორონავირუსისთვის, რამე პათოლოგია და საშიშროება ამ დროისთვის არ შეინიშნება", — აცხადებენ ინფექციურში.