გირჩის ლიდერის, ვახტანგ მეგრელიშვილის განცხადებით, ევროპული საბჭოს პრეზიდენტის წარმომადგენელის მონაწილეობით მოლაპარაკებები ხვალაც გაგრძელდება. როგორც მან აღნიშნა, შეთანხმება არ იქნება მანამ, სანამ ყველა საკითხს არ გაივლიან.

"დღეს გვქონდა შეხვედრა ძალიან პროდუქტიული, რომელიც ხვალაც გაგრძელდება. ხვალ იქნება უფრო მნიშვნელოვანი ნაწილი, რომლითაც დავასრულებთ... შეთანხმება ნიშნავს ყველაფერზე შეთანხმებას, არა რომელიმე კონკრეტულ საკითხზე, არამედ ყველაფერზე. შესაბამისად, არ დაგვისრულებია. შეთანხმება არ იქნება მანამდე, ვიდრე ყველაფერს არ გავივლით", — აღნიშნა მეგრელიშვილმა.

დღეს გაიმართა პირველი ერთობლივი შეხვედრა ქართულ ოცნებასა და ოპოზიციას შორის, ევროკავშირის წარმომადგენლის, კრისტიან დანიელსონის მონაწილეობით. შვედი დიპლომატი აქამდე მხოლოდ ინდივიდუალურად ხვდებოდა პარტიებს.

კრისტიან დანიელსონი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მედიაციის პროცესში, მეექვსე დღეა მართავს შეხვედრებს. გარდა პარტიების ლიდერებისა, იგი შეხვდა არასამთავრობო ორგანიზაციების წარმომადგენლებს. ასევე, რამდენჯერმე შეხვდა პრეზიდენტ სალომე ზურაბიშვილსაც.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: