სტრატეგია აღმაშენებლის ლიდერი, გიორგი ვაშაძე ამბობს, რომ მისთვის გაუგებარია მიზეზი, რის გამოც ლეიბორისტული პარტიის ლიდერმა, შალვა ნათელაშვილმა შეხვედრა დატოვა. ამის შესახებ ვაშაძემ ევროპული საბჭოს პრეზიდენტის წარმომადგენლის, კრისტიან დანიელსონის მონაწილეობით გამართული მოლაპარაკებების შემდეგ განაცხადა.

"პატივს ვცემ ბატონ შალვას, ზუსტად ვერ გავიგე მისი მიზეზი, მაგრამ პატივს ვცემ ბატონ შალვას. მან დატოვა, ჩვენ ვიმუშავეთ მთელი დღე", — აღნიშნა ვაშაძემ.

გარდა ამისა, მან ისაუბრა, რომ დღეს რთული სამუშაო ჰქონდათ, თუმცა გარკვეული ნაბიჯები გადადგმულია. ამასთან, მან მკაფიოდ თქვა, რომ არაფერია შეთანხმებული, სანამ ყველაფერი არ შეთანხმდება. ვაშაძემ მოლაპარაკებების შინაარსზე არ ისაუბრა:

"მარტივად არ მიდის პროცესი, ხვალ ვაგრძელებთ მოლაპარაკებებს. და იმედი მაქვს, რომ ხუთივე საკითხთან დაკავშირებით ამ ექვსპუნქტიანი გეგმიდან შევთანხმდებით".

დღეს გაიმართა პირველი ერთობლივი შეხვედრა ქართულ ოცნებასა და ოპოზიციას შორის, ევროკავშირის წარმომადგენლის, კრისტიან დანიელსონის მონაწილეობით. შვედი დიპლომატი აქამდე მხოლოდ ინდივიდუალურად ხვდებოდა პარტიებს.

შეხვედრა მალევე პროტესტის ნიშნად დატოვა ლეიბორისტული პარტიის ლიდერმა, შალვა ნათელაშვილმა. როგორც მან ჟურნალისტებს უთხრა, შეხვედრას ტოვებს, რადგან პირველ საკითხად რიგგარეშე არჩევნები და პოლიტპატიმრების გათავისუფლება არ განიხილება.

კრისტიან დანიელსონი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მედიაციის პროცესში, მეექვსე დღეა მართავს შეხვედრებს. გარდა პარტიების ლიდერებისა, იგი შეხვდა არასამთავრობო ორგანიზაციების წარმომადგენლებს. ასევე, რამდენჯერმე შეხვდა პრეზიდენტ სალომე ზურაბიშვილსაც.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: