პრემიერმინისტრი, ირაკლი ღარიბაშვილი საპატრიარქოში ილია მეორეს შეხვდა. როგორც ღარიბაშვილმა ჟურნალისტებთან თქვა, ბოლო პერიოდში ეკლესიასა და პატრიარქზე მიზანმიმართული შეტევა ხორციელდება, რასაც მან "ანტისახელმწიფოებრივი, მტრული" უწოდა.

"ჩემთვის ყოველთვის დიდი ბედნიერებაა ჩვენს უწმინდესთან, ჩვენს პატრიარქთან შეხვედრა. დღევანდელი შეხვედრით, მე კიდევ ერთხელ გამოვხატე ჩვენი დიდი პატივისცემა და დიდი მოკრძალება და სიყვარული პატრიარქის მიმართ, მთლიანად ეკლესიისა და საპატრიარქოს მიმართ.

მოგეხსენებათ რომ დღევანდელი დრო არის გამოწვევებით აღსავსე. ჩვენ გავხდით მომსწრენი უპრეცედენტო შეტევისა ეკლესიის და უშუალოდ პატრიარქის წინააღმდეგ. არნახული ცილისწამებების კასკადი ვიხილეთ, რაც, რა თქმა უნდა, არის აბსოლუტურად მიუღებელი, ანტისახელმწიფოებრივი, მტრული და არ ემსახურება ჩვენი ხალხის და ეკლესიის ინტერესებს. მე როგორც მთავრობის მეთაურმა სრული მხარდაჭერა, რაც შემეძლება, და გვერდში დგომა ეკლესიას აღვუთქვი და დავუდასტურე ჩემი მოკრძალებული პატივისცემა და სიყვარული", — აღნიშნა ღარიბაშვილმა.