თბილისის მერის კახა კალაძის თქმით, "პროგრეს ბანკის" საქმესთან დაკავშირებით გამოძიება მათი ინიციატივით მიმდინარეობს. მისივე თქმით, "არიან ადამიანები, რომლებიც კონკრეტულ პირებს აშანტაჟებენ სხვადასხვა საკითხით".

"საგამოძიებო მოქმედებები უკავშირდება იმას, რომ, სამწუხაროდ, არიან ადამიანები, რომლებიც კონკრეტულ პირებს აშანტაჟებენ სხვადასხვა საკითხით. დაწყებულია გამოძიება და ყველას გაეცემა შესაბამისი პასუხი. გამოძიება ჩვენი ინიციატივით მიმდინარეობს", — განაცხადა კახა კალაძემ და აღნიშნა, რომ საზოგადოება ყველაფერს გაიგებს, მათ შორის იმას, თუ რა არის გამოკვლევის საგანი.

ჟურნალისტის შეკითხვაზე, არის თუ არა ის მზად, ითანამშრომლოს გამოძიებასთან, თბილისის მერმა დასძინა: "აღნიშნულ საქმესთან დაკავშირებით, ჩემი გამოძიებასთან სათანამშრომლო არაფერი არ არის".

შეგახსენებთ, რომ "ტვ პირველმა" გაავრცელა ინფორმაცია იმის შესახებ, რომ ფინანსთა სამინისტროს საგამოძიებო სამსახური სწავლობს "პროგრეს ბანკის" არქივს — ბანკის, რომელიც კახა კალაძის მონაწილეობით შეიქმნა და უკვე წლებია აღარ ფუნქციონირებს. გამოძიების ფარგლებში ფინანსური დოკუმენტაცია კერძო საცხოვრებელი სახლიდან ამოიღეს იმ პირისგან, რომელიც ბანკში მუშაობდა და მოგვიანებით მისი მემკვიდრე სააქციო საზოგადოების ფორმალურ ხელმძღვანელად ითვლებოდა, — წერია მათ მიერ გავრცელებულ ინფორმაციაში.