ოცნების ხელისუფლების პრემიერმინისტრის, ირაკლი კობახიძის მოწოდების შემდეგ, სახელმწიფო უსაფრთხოების სამსახური სამომხმარებლო ფასების შესწავლას იწყებს. ამის შესახებ სუს-ის უფროსის პირველმა მოადგილემ ლაშა მაღრაძემ 24 დეკემბერს განაცხადა

"სახელმწიფო უსაფრთხოების სამსახური იწყებს, თავისი კომპეტენციის ფარგლებში, საკითხის დეტალურ შესწავლას და შესაბამისი მკაცრი სამართლებრივი რეაგირება მოჰყვება ნებისმიერ ისეთ მართლსაწინააღმდეგო ქმედებას, რომელიც ზიანს აყენებს საქართველოს მოქალაქეთა ინტერესებს და ჩვენი ქვეყნის ეკონომიკურ უსაფრთხოებას", — განაცხადა ლაშა მაღრაძე. მის კომენტარს სამთავრობო მედია ავრცელებს.

გუშინ, 24 დეკემბერს, ქართულმა ოცნებამ სოციალურ ქსელში გაავრცელა ვიდეორგოლი, სადაც ირაკლი კობახიძე სასურსათო პროდუქტების გაზრდილ ფასებზე საუბრობს და სუს-ს საკითხის შესწავლისკენ მოუწოდებს და დაადგინონ, ხომ არ იკვეთება დანაშაულის ნიშნები. ამას გარდა, ის პარლამენტს სთხოვს," შექმნას საპარლამენტო კომისია, რომელიც საკითხის შესაფასებლად შესაბამის საპარლამენტო ბერკეტებს გამოიყენებს".