ტრამპის ადმინისტრაცია 30 დიპლომატს — ელჩებსა და საელჩოების სხვა მაღალჩინოსნებს გაიწვევს, რადგან საზღვარგარეთ აშშ-ის დიპლომატიური პოზიცია იმ პერსონალით იყოს დაკომპლექტებული, რომელიც დონალდ ტრამპის პოლიტიკურ ხედვას — "ამერიკა უპირველეს ყოვლისა" მხარს სრულად უჭერს — ამის შესახებ Associated Press გვატყობინებს.

სახელმწიფო დეპარტამენტის ორი ოფიციალური პირის თქმით, სულ მცირე 29 ქვეყანაში მისიის ხელმძღვანელებს აცნობეს, რომ მათ უფლებამოსილება იანვარში შეუწყდებათ.

ყველა მათგანი თანამდებობაზე ჯო ბაიდენის ადმინისტრაციის დროს დაინიშნა, თუმცა გადაურჩა ტრამპის მეორე ვადის პირველ თვეებში განხორციელებულ "წმენდას", რომელიც ძირითადად პოლიტიკური თანამდებობების პირებს შეეხო.

ელჩები პრეზიდენტის ნდობით სარგებლობენ, თუმცა, როგორც წესი, პოსტებზე სამი–ოთხი წლის განმავლობაში რჩებიან. აღნიშნული ცვლილებების შედეგად დაზარალებულები საგარეო სამსახურს არ ტოვებენ, თუმცა სურვილის შემთხვევაში ვაშინგტონში სხვა დავალებებზე დაბრუნდებიან.

სახელმწიფო დეპარტამენტმა უარი თქვა კონკრეტული ციფრებისა და კონკრეტული ელჩების დასახელებაზე, თუმცა აღნიშნული ცვლილება გაამართლა და ის "ნებისმიერი ადმინისტრაციისთვის სტანდარტული პროცესად" შეაფასა. უწყებამ აღნიშნა, რომ ელჩი "პრეზიდენტის პირადი წარმომადგენელია" და პრეზიდენტს აქვს უფლება უზრუნველყოს, რომ ამ ქვეყნებში მის ინტერესებს წარმოადგენდნენ ის პირები, რომლებიც მის და ამერიკის ინტერესებს ითვალისწინებს.

AP წერს, რომ აფრიკა არის კონტინენტი, საიდანაც ყველაზე მეტ ელჩს, 13 ელჩს გაიწვევენ. ეს ქვეყნებია — ბურუნდი, კამერუნი, კაბო-ვერდე, გაბონი, კოტ-დ’ივუარი, მადაგასკარი, მავრიკი, ნიგერი, ნიგერია, რუანდა, სენეგალი, სომალი და უგანდა.

მეორე ადგილზეა აზია, სადაც ელჩების ცვლილება 6 ქვეყანას შეეხება: ფიჯი, ლაოსი, მარშალის კუნძულები, პაპუა–ახალი გვინეა, ფილიპინები და ვიეტნამი.

ცვლილებები შეეხება ევროპის 4 ქვეყანასაც — სომხეთს, მაკედონიას, მონტენეგროსა და სლოვაკეთს; ასევე 2-2 ქვეყანას ახლო აღმოსავლეთში (ალჟირი და ეგვიპტე), სამხრეთ და ცენტრალურ აზიაში (ნეპალი და შრი-ლანკა) და დასავლეთ ნახევარსფეროში (გვატემალა და სურინამი).

ელჩების გაწვევის შესახებ პირველად გამოცემა Politico-მ დაწერა. ამ გადაწყვეტილებამ შეშფოთება გამოიწვია ზოგიერთი კანონმდებლისა და ამერიკელი დიპლომატების წარმომადგენელი პროფკავშირის მხრიდან.