ჯანმრთელობასთან დაკავშირებულ რეკომენდაციებს ყველაზე ხშირად და თითქმის ყველასგან ვისმენთ — ექიმებისგან, ინფლუენსერებისგან, ტრენერებისგან და ოჯახის წევრებისგან. ზოგჯერ იმ აბეზარი მეზობლისგანაც კი, ჩვენი მომატებული ორი კილო რომ არასდროს ეპარება და ჯანმრთელობაზე ზრუნვის საბაბით, ყოველთვის უტაქტოდ აღნიშნავს ხოლმე ამას. მკითხველებს რეკომენდაციებს ჩვენც ხშირად გიზიარებთ.

რჩევების იმ ზღვაში, ლამისაა რომ დაგვახრჩოს, ბოლო პერიოდში განსაკუთრებული ყურადღება ეთმობა მიკრობიომს — ნაწლავებში არსებულ ტრილიონობით ბაქტერიას. მეცნიერები მას "მეორე ტვინსაც" კი უწოდებენ და მის პირდაპირ კავშირს იმუნიტეტთან, კანის მდგომარეობასთან თუ გუნება-განწყობასთან ხშირად უსვამენ ხაზს.

მოკლედ რომ ავხსნათ, მიკრობიომი შინაგანი ეკოსისტემაა, რომელიც 24 საათის განმავლობაში მუშაობს. ბაქტერიები მხოლოდ საჭმლის მონელებაში კი არ გვეხმარებიან, იმასაც აკონტროლებენ, რამდენად ძლიერი იქნება ორგანიზმის პასუხი ვირუსებზე ან რამდენად მშვიდად ვიგრძნობთ თავს სტრესულ სიტუაციაში. ასე რომ, დიდად საჭირო და გამოსადეგი რამეა!

ფოტო: Freepik

როგორც კი ჯანმრთელი ნაწლავის მნიშვნელობა გავიაზრეთ, აფთიაქებისა და მაღაზიების დახლებზე მალევე გამრავლდა საკვები დანამატები და პრობიოტიკებით "მდიდარი" პროდუქტი. სოციალურ ქსელებშიც უხვად გამოჩნდა ხასხასა მწვანე "სმუზების" რეცეპტები. არადა, ჯანმრთელობის ამ საიდუმლოს დიდი ხნის წინ მიაგნეს ჩვენმა წინაპრებმა. სანამ თანამედროვე ლაბორატორიები ამ ბაქტერიების მნიშვნელობას დაამტკიცებდნენ, ჩვენი ბებო-ბაბუები და მათი ბებო-ბაბუებიც ინტუიციით ხვდებოდნენ, რა სჭირდებოდა მათ ორგანიზმს.

ფოტო: RevolutionFermentation

კი — მაწონი! ის ბაქტერიების იმ უნიკალურ შტამებს შეიცავს, რომლებიც ჩვენს ბიოლოგიასთან იდეალურადაა თავსებადი. გინახავთ, ალბათ, როგორ ურევენ ოდნავ შემთბარ რძეს მაწვნის დედას და მერე საგულდაგულოდ ფუთავენ პლედით — სწორედ მაგ დროს გადის მაწონი ფერმენტაციის იმ პროცესს, რომელიც სხეულისთვის ცილისა და ვიტამინების ათვისებას გაცილებით აადვილებს. მეტსაც გეტყვით: მაწონს ხან ნივრით (ბუნებრივი ანტიბიოტიკი), ნიგვზით (ჯანსაღი ცხიმი) ან მწვანილით რომ აზავებდნენ, ეს მხოლოდ გემოვნების საკითხი არ იყო.

ამიტომ, სულ გვახსოვდეს, რომ ჩვენი ორგანიზმისთვის ყველაზე ახლობელი და ეფექტიანი პრობიოტიკი, შესაძლოა, სულ ახლოს, სამზარეულოში გველოდებოდეს — თანაც დატესტილი და დამტკიცებული!