კოალიცია ცვლილებებისთვის ერთ-ერთი წევრის, გელა ხასაიას ადვოკატმა, ომარ ფურცელაძემ სასამართლო პროცესის შემდეგ ჟურნალისტებთან საუბრისას განაცხადა, რომ საქმეზე დაკითხული ორი მოწმის ჩვენება ერთმანეთს გამორიცხავს.

ფურცელაძემ ასევე ისაუბრა იმ თავდასხმის ამსახველ ვიდეოჩანაწერებზე, რომელზეც ოპოზიციონერ აქტივისტს ედავებიან — ადვოკატის განმარტებით უწყებამ შემთხვევის ამსახველი ვიდეოჩანაწერები გაანადგურა, რითაც ხასაიას უდანაშაულობა დადგინდებოდა.

"ორი მთავარი მოწმის ჩვენება ერთმანეთს გამორიცხავს. ფიზიკურად შეუძლებელია ორივეს ერთდროულად ჰქონოდა ადგილი, რადგანაც გამორიცხულია მოვლენათა თანმიმდევრობა და არასწორად აღწერენ ერთმანეთთან ურთიერთკავშირს, რაც ძალიან მნიშვნელოვანი უნდა ყოფილიყო გამოძიებისთვის. ამაზე უფრო ტრაგიკული და სევდიანი არის ის, რომ გამოძიებას რეაგირება არცერთ შემთხვევაში მოუხდენია. ბუნებრივია სასამართლო მოკლებული იქნება შესაძლებლობას აღნიშნული ორივე ჩვენება გაიზიაროს და მას დააყრდნოს გადაწყვეტილება. დღეს გამომძიებლების ჩვენებებით, ჩვენ შევძელით დადასტურება, რომ წარმოდგენილ მოწმეთაგან მათ მიერ მიცემულ ჩვენებაში სანდო არცერთი არ არის. ასევე ორივე მოწმის ჩვენება აღებული ერთად და ცალ-ცალკე, არ ემთხვევა და პირიქით, ეწინააღმდეგება გამოკვლეულ და გამოსაკვლევ ვიდეომასალებს წარმოდგენილ საქმეზე.

მეორე და არანაკლებ მნიშვნელოვანი — ნაჩვენებია და დადასტურებულია სასამართლოს წინაშე, რომ გამოძიება ჯერ კიდევ 4 სექტემბერს გვთხოვდა ყველა საჭირო ინფორმაციას იმისთვის, რომ დაეიდენტიფიცირებინა ვიდეოკამერები და შესაბამისად, გამოეთხოვა ჩანაწერები, მაგრამ ზუსტად იმ მიზნით, რომ ვიდეო-ჩანაწერები, რომლებიც გამორიცხავდა გელა ხასაიას მიერ დანაშაულის ჩადენის ფაქტს, გამოთხოვილ იქნა ერთი თვის შემდეგ. ეს უკვე შესაძლებელს გახდიდა დამალულიყო ადგილზე მომხდარი მოვლენათა თანმიმდევრობა. ამასთან, გელა ხასაია დაკავებული იქნა ერთი თვის შემდეგ, რომ ასევე დაცვის მხარეს არ გვქონოდა საშუალება გამოგვეთხოვა ვიდეო — კამერის ჩანაწერები. ფაქტობრივად, სამეთვალყურეო სისტემის ჩანაწერები, რომლებიც თავიდან ბოლომდე ახსნიდა მომხდარ შემთხვევას და დაადასტურებდა ხასაიას უდანაშაულობას განზრახ და მიზანმიმართულად განადგურებულია.

ძალიან მნიშვნელოვანია ის ფაქტი, რომ გელა ხასაიას საქმეზე დღეს გამომძიებლებმა სასამართლოს ვერ მისცეს სარწმუნო ჩვენება იმ ნაწილში, თუ რა ვითარებაში მოხდა გელა ხასაიას დაკავება," — განახადა ომარ ფურცელაძემ.

ცნობისთვის, გელა ხასაია 29 სექტემბერს, გვიან ღამით დააკავეს. სასამართლო გელა ხასაიას და ვასილ ქერდიყოშვილს ჯგუფურ ძალადობას ედავება. პროკურატურის განმარტებით, ხასაიამ და ქერდიყოშვილმა ვაგზლის მოედნის მიმდებარე ტერიტორიაზე, რამაზ ჩადუნელს ჯანმრთელობის დაზიანება მიაყენეს — მიუხედავად ჯგუფური ძალადობის მუხლისა, ბრალდებულები აცხადებენ, რომ ერთმანეთს არ იცნობენ. 3 დეკემბერს, ვასილ ქერდიყოშვილმა ბრალი აღიარა და პროკურატურასთან საპროცესო შეთანხმებაზე მუშაობს.

გელა ხასაია დღემდე არ აღიარებს ბრალს, მას 4-დან 6 წლამდე თავისუფლების აღკვეთას ემუქრება.

• პროკურატურამ გელა ხასაიას ბრალდება წარუდგინა — მას 4-დან 6 წლამდე თავისუფლების აღკვეთა ემუქრება
• შსს-ს ცნობით, გელა ხასაიას მომჩივანი მასზე სექსუალური ხასიათის ძალადობას ცდილობდა, რამაც ბრალდებულის გაღიზიანება გამოიწვია