ევროკომისია აშშ-ის მიერ ყოფილი ევროკომისრისა და კიდევ 4 პირისთვის სავიზო შეზღუდვების დაწესებას გმობს. ამის შესახებ ევროკომისიის მიერ გავრცელებულ განცხადებაშია ნათქვამი.

წერილში აღნიშნულია, რომ "გამოხატვის თავისუფლება ევროპაში ფუნდამენტური უფლებაა და დემოკრატიულ სამყაროში შეერთებულ შტატებთან გაზიარებულ ძირითად ღირებულებას წარმოადგენს". წერილის ავტორები წერენ, რომ "საჭიროების შემთხვევაში, სწრაფად და მტკიცედ უპასუხებენ, რათა დაიცვან ავტონომია გაუმართლებელი ზომების წინააღმდეგ."

"ევროკომისია აშშ-ის მიერ ხუთი ევროპელი პირის, მათ შორის — ყოფილი ევროპელი კომისრის, ტიერი ბრეტონის მიმართ სამოგზაურო შეზღუდვების შემოღებას მკაცრად გმობს.

გამოხატვის თავისუფლება ევროპაში ფუნდამენტური უფლებაა და დემოკრატიულ სამყაროში შეერთებულ შტატებთან გაზიარებულ ძირითად ღირებულებას წარმოადგენს.

ევროკავშირი არის ღია, წესებზე დაფუძნებული ერთიანი ბაზარი, რომელსაც აქვს სუვერენული უფლება, დაარეგულიროს ეკონომიკური საქმიანობა ჩვენი დემოკრატიული ღირებულებებისა და საერთაშორისო ვალდებულებების შესაბამისად.

ჩვენი ციფრული წესები უზრუნველყოფს უსაფრთხო, სამართლიან და თანაბარ სათამაშო ველს ყველა კომპანიისთვის და გამოიყენება სამართლიანად, დისკრიმინაციის გარეშე.

ჩვენ აშშ-ის ხელისუფლებისგან განმარტებები ვითხოვეთ და ვაგრძელებთ ჩართულობას.

საჭიროების შემთხვევაში, სწრაფად და მტკიცედ ვუპასუხებთ, რათა დავიცვათ ჩვენი მარეგულირებელი ავტონომია გაუმართლებელი ზომების წინააღმდეგ", — წერს ევროკომისია ოფოციალურ ვებგვერდზე.

ცნობისთვის, Reuters-ის ინფორმაციით, ტრამპის ადმინისტრაციამ სავიზო აკრძალვები ხუთ ევროპელ პირს, მათ შორის ევროკომისიის ყოფილ კომისარს ტიერი ბრეტონს დაუწესა, იმ ბრალდებით, რომ ისინი ევროკავშირის მასშტაბით ამერიკული სოციალური მედია პლატფორმებისთვის ცენზურის დაწესებაში მონაწილეობდნენ.

აშშ-ის ოფიციალური პირების თქმით, ეს ნაბიჯი ევროკავშირის ციფრული სერვისების აქტის (DSA) წინააღმდეგ ფართო კამპანიის ნაწილია, რომელსაც ვაშინგტონი გამოხატვის თავისუფლების შემზღუდველად და ამერიკული ტექნოლოგიური კომპანიებისთვის ტვირთად მიიჩნევს.

ქვეყანაში შესვლის აკრძალვა შეეხოთ: ტიერი ბრეტონს; ციფრული სიძულვილის წინააღმდეგ ბრძოლის ცენტრის ხელმძღვანელ იმრან აჰმედის; გერმანული ორგანიზაცია HateAid-ის წარმომადგენლებს ანა-ლენა ფონ ჰოდენბერგსა და იოზეფინა ბალონის და Global Disinformation Index-ის თანადამფუძნებელ კლერ მელფორდს.

ზოგიერთმა მათგანმა ბრალდებები უარყო და ვიზის აკრძალვები ევროპული კანონმდებლობის აღსრულების ხელის შეშლის მცდელობად და სიტყვის თავისუფლებაზე თავდასხმად შეაფასა.