ევროპელმა და ამერიკელმა პარლამენტარებმა 26 თებერვალს საერთო განცხადება გააკეთეს და ნაციონალური მოძრაობის თავმჯდომარის, ნიკა მელიას დაკავებას კიდევ ერთხელ გამოეხმაურნენ. პარლამენტარების თქმით, მელიას დასაკავებლად ენმ-ს ოფისზე განხორციელებულმა შტურმმა საქართველოს დემოკრატიის სისუსტე გამოააშკარავა.

"ნაციონალური მოძრაობის თავმჯდომარის, ნიკა მელიას დასაკავებლად პარტიის ოფისის შტურმმა გამოააშკარავა საქართველოს დემოკრატიისა და თავისუფლების სისუსტე. ძალადობა საქართველოს ხელისუფლების მიზნებთან შეუთავსებელია და ეწინააღმდეგება 2020 წლის 8 მარტის შეთანხმებას, რომელიც ევროკავშირის და ამერიკის შეერთებული შტატების ელჩების შუამდგომლობით თბილისში გაფორმდა", — წერია იქ.

პარალმენტარები მოუწოდებენ ქართველებს, რომ ერთობლივი ძალებით იპოვონ ბოლო დროს განვითარებული პრობლემების აღმოსაფხვრელად გამოსავალი.

"დესტაბილიზაციისა და ანტიდემოკრატიული ქმედებები, რომელიც საპარლამენტო არჩევნების შემდეგ დაიწყო და დღემდე გრძელდება, აჩვენებს მათ პირად პასუხისმგებლობას, ვისაც ძალაუფლება აქვს. თავისუფალ ევროპულ ოჯახში საქართველოს ადგილი ეჭქვეშ არ დგას, მაგრამ ძალადობისა და თავისუფლებაზე თავდასხმის გამო, ის საფრთხის ქვეშაა", — ნათქვამია განცხადებაში.

ხელმომწერებს დღეს აშშ-ს წარმომადგენელთა პალატის საგარეო საქმეთა კომიტეტის თავმჯდომარე, გრეგორი მიკსიც შეუერთდა. ამის შესახებ ლიეტუვის პარლამენტის საგარეო საქმეთა კომიტეტის თავმჯდომარემ, ჟიგიმანტას პავილიონისიმ ტვიტერზე დაწერა.

განცხადებას ხელს აწერენ:

  • ჩეხეთის სენატის საგარეო საქმეთა, თავდაცვის და უსაფრთხოების კომიტეტის თავმჯდომარე, პაველ ფიშერი;
  • პოლონეთის სეიმის საგარეო საქმეთა კომიტეტის თავმჯდომარე, მარეკ კუხჩინსკი;
  • ლატვიის სეიმის საგარეო საქმეთა კომიტეტის თავმჯდომარე, რიჩარდს კოლსი;
  • აშშ-ს წარმომადგენელთა პალატის საგარეო საქმეთა კომიტეტის თავმჯდომარე, გრეგორი მიკსი;
  • აშშ-ს სენატის საგარეო საქმეთა კომიტეტის თავმჯდომარე, რობერტ მენენდესი;
  • ესტონეთის პარლამენტის საგარეო საქმეთა კომიტეტის თავმჯდომარე, მარკო მიხკელსონი;
  • ლიეტუვის პარლამენტის საგარეო საქმეთა კომიტეტის თავმჯდომარე, ჟიგიმანტას პავილიონისი;
  • გერმანიის ბუნდესტაგის საგარეო საქმეთა კომიტეტის თავმჯდომარე, ნორბერტ როტგენი;
  • დიდი ბრიტანეთის საგარეო საქმეთა კომიტეტის თავმჯდომარე, ტომ ტუგენდჰატი.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

მელიას დაკავებას საქართველოს მეგობარ ქვეყნებსა თუ პარტნორ ორგანიზაციებში კრიტიკული შეფასებები მოჰყვა. აშშ-ის პოზიცია საქართველოში ქვეყნის საელჩომ გამოხატა და თქვა, რომ ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე უკან დაიხია. შეშფოთება გამოთქვა ამერიკელმა კონგრესმენმა, საქართველოს მეგობართა ჯგუფის თანათავმჯდომარე ადამ კინზინგერმაც და მომხდარს დარბევა უწოდა. ევროკავშირის ელჩის, კარლ ჰარცელის განცხადებით კი, ქვეყანაში არსებულ ვითარებაზე პასუხისმგებლობა ყველა მხარემ უნდა აიღოს. მისი თქმით, საქართველოში პოლიტიკური კრიზისი ღრმავდება. ევროპარლამენტარ მარკეტა გრეგოროვას განცხადებით კი, ნაციონალური მოძრაობის თავმჯდომარე, ნიკა მელიას დაპატიმრება დემოკრატიის უკუსვლის აისბერგის მხოლოდ წვერია.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.