საქართველოს სახალხო დამცველისთვის, უჩა ნანუაშვილისთვის გაუგებარია, რატომ უნდა შეჩერდეს 11 თვის განმავლობაში საზოგადოებრივი მაუწყებლის არხებზე პროგრამები.

„რეფორმა მაუწყებელში არის აუცილებელი, მაგრამ რეფორმა არ უნდა შეეხოს ჟურნალისტებს, იმ ადამიანებს, რომლებიც იქ მოქმედებენ. მაქსიმალურად უნდა იყოს მათი უფლებები დაცული. კითხვის ნიშნები არსებობს, თუ რატომ არის საჭირო 11 თვით სხვადასხვა პროგრამების გაჩერება. მით უმეტეს იმ ფონზე, როდესაც ქვეყანაში მიმდინარეობს საკმაოდ აქტიური პოლიტიკური პროცესები: საკონსტიტუციო რეფორმა და მზადება ადგილობრივი თვითმმართველობის არჩევნებისთვის"- განაცხადა უჩა ნანუაშვილმა, რომელიც საზოგადოებრივი მაუწყებლის ნაკისრ ვალდებულებებსაც შეეხო.

საზოგადოებრივი მაუწყებელი ვალდებულია ჰქონდეს საინფორმაციო, საზოგადოებრივ პოლიტიკური პროგრამა და არჩევნების პერიოდში დებატები. გარდა ამისა, ასახავდეს საზოგადოების ყველა ჯგუფის ინტერესებს.

6 თებერვალს საზოგადოებრივი მაუწყებლის გენერალურმა დირექტორმა, ვასილ მაღლაფერიძემ საკუთარი ხედვა წარადგინა, რომლის მიხედვითაც 11 თვის განმავლობაში მაუწყებელზე 101 გადაცემის შეჩერებაა გათვალისწინებული.