საქართველოს პრემიერმინისტრი გიორგი კვირიკაშვილი საზოგადოებრივ მაუწყებელში მიმდინარე პროცესებს ეხმაურება. მისი თქმით, ის მიესალმება იმ პროცესებს, რაც არხზე მიმდინარეობს.

პრემიერი აცხადებს, რომ საზოგადოების, ისე ხელისუფლების ინტერესია, ქვეყანაში არსებობდეს წარმატებული და თანამედროვე საზოგადოებრივი მაუწყებელი:

"ძალიან მნიშვნელოვანია, ჩვენმა საზოგადოებამ იცოდეს, რომ ხელისუფლება დაინტერესებულია, საქართველოში არსებობდეს ყველაზე თანამედროვე სტანდარტების შესაბამისი, დამოუკიდებელი და საინტერესო საზოგადოებრივი მაუწყებელი. დღეს ჩვენ ათეულობით მილიონ ლარს ვიხდით ამ პროდუქტში და ვერ შევეგუებით, რომ ამ თანხის შედეგად მივიღოთ პროდუქტი, რომელიც არ იქნება თანამედროვე და საინტერესო. ასევე გვინდა, რომ ეს იყოს მართლაც ჭეშმარიტად საზოგადოების ინტერესების გამომხატველი ტელევიზია. ამიტომ, ჩვენ მივესალმებით საზოგადოებრივ მაუწყებელში დაწყებულ პროცესს, მივესალმებით პოლემიკას, მივესალმებით მაქსიმალურ ჩართულობას, იმისთვის, რომ იყოს სხვადასხვა მიდგომების ჭიდილი. გვაქვს იმედი, რომ პროცესები წარიმართება ცივილურად და მივიღებთ ისეთ ტელევიზიას, როგორსაც იმსახურებს თითოეული ჩვენი მოქალაქე, რომელიც საკუთარი ჯიბიდან იხდის საფასურს".

აღნიშნული განცხადება გიორგი კვირიკაშვილმა მთავრობის სხდომის დაწყებამდე გააკეთა.

შეგახსენებთ, რომ არხის ახალი გენერალური დირექტორი, ვასილ მაღლაფერიძე, 2018 წლამდე ყველა გადაცემის დახურვას გეგმავს, მოამბის გარდა.