ამერიკელი სენატორები და კონგრესმენები საქართველოს ხელისუფლებას ყველა პოლიტპატიმრის, მათ შორის ნაციონალური მოძრაობის თავმჯდომარის, ნიკა მელიასა და გიორგი რურუას გათავისუფლებისკენ მოუწოდებენ. ამის შესახებ მათ ერთობლივი განცხადება გამოაქვეყნეს, რომელსაც ხელს აწერს, ამერიკელი სენატორები ჯინ შაჰინი, ჯიმ რიში და აშშ-ის კონგრესში საქართველოსთან მეგობრობის ჯგუფის თანათავმჯდომარეები, ადამ კინზინგერი და ჯერი კონოლი.

"საქართველოს მთავრობის გადაწყვეტილება, ძალადობრივად დაერბია ნაციონალური მოძრაობის შტაბი მისი ლიდერის, ნიკა მელიას და ათობით აქტივისტის დასაპატიმრებლად, ღრმად შემაშფოთებელია. საქართველოს სამართალდამცავი ორგანოებისა და სასამართლო სისტემის კორუმპირებული გამოყენება პოლიტიკურად მოტივირებული ქმედებების განსახორციელებლად, საფრთხის წინაშე აყენებს იმას, რაც დარჩენილია საქართველოს დემოკრატიისა და მის ევროატლანტიკურ გზაზე.

ჩვენ მოვუწოდებთ ყველა პოლიტპატიმრის, მათ შორის, ნიკა მელიასა და გიორგი რურუას დაუყოვნებლივ გათავისუფლებისკენ. საქართველოს ყველა პოლიტიკურმა პარტიამ უნდა შეწყვიტოს პროვოკაციები და ამ კრიზისის მშვიდობიანად მოსაგვარებლად მოილაპარაკოს", — ნათქვამია განცხადებაში.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.