პარლამენტმა არჩევნების შედეგებთან დაკავშირებით დროებითი საარჩევნო კომისიის შექმნას მხარი დაუჭირა. გადაწყვეტილება პლენარულ სხდომაზე გახდა ცნობილი.

დადგენილება დეპუტატებმა 78 ხმით მიიღეს, კომისია არამუდმივი ხასიათის იქნება და მისი ფუნქციონირების ხანგრძლივობა 3 თვე იქნება.

კომისიაში მონაწილეობაზე უარს აცხადებს ოპოზიცია. პარტია მოქალაქეების ლიდერი, ალეკო ელისაშვილი აცხადებდა, რომ იმ შემთხვევაში მიიღებს საგამოძიებო კომისიაში მონაწილეობას, თუ მასში ჩაერთვებიან ის ოპოზიციური პარტიები, რომლებსაც უბნებზე ყველაზე მეტი დამკვირვებელი ჰყავდათ.

რაც შეეხება მმართველ გუნდს, პარლამენტის თავმჯდომარე, არჩილ თალაკვაძე აცხადებდა, რომ თუ ოპოზიცია საგამოძიებო კომისიაში მონაწილეობაზე უარის იტყოდა, ჩაითვლებოდა, რომ მათი ბრალდება არჩევნების გაყალბების შესახებ აღარ არსებობს.

ქართულმა ოცნებამ ოპოზიციას შესთავაზა, რომ პარლამენტში შევიდეს და საგამოძიებო კომისიის საქმიანობაში მიიღოს მონაწილეობა, რომელმაც არჩევნების გაყალბება უნდა შეისწავლოს. მმართველი გუნდის განცხადებით, თუ კომისია 1%-იან გაყალბებას მაინც დაადასტურებს "ოცნების" სასარგებლოდ, ვადამდელ არჩევნებს დანიშნავენ, თუმცა ოპოზიცია აცხადებდა, რომ არჩევნების შედეგების შესწავლა უკვე დაგვიანებული იყო, რადგან ყველაფერი "თავიდან დაიწერა".

2020 წლის 31 ოქტომბრის არჩევნების შედეგებს ოპოზიცია გაყალბებულად მიიჩნევს, უმრავლესობამ საპარლამენტო მანდატზე უარი განაცხადა.