აშშ იემენში მხარს აღარ დაუჭერს ჰუსიტების წინააღმდეg მოქმედ კოალიციას, რომლის სათავეში საუდის არაბეთია. ამის შესახებ პრეზიდენტმა, ჯო ბაიდენმა სახელმწიფო დეპარტამენტში გამოსვლისას განაცხადა, სადაც საგარეო პოლიტიკის პრიორიტეტებზე ისაუბრა.

აშშ-ს წინა ორი პრეზიდენტი მხარს უჭერდა იემენში ჰუსიტების წინააღმდეგ საბრძოლო მოქმედებებს. თუმცა მომავალში აშშ შეწყვეტს საუდის არაბეთის კოალიციის ოპერაციების მხარდაჭერას და მისთვის იარაღის მიწოდებას.

"იემენში ომი უნდა დასრულდეს", — განაცხადა ბაიდენმა და დაამატა, რომ ომმა ჰუმანიტარული და სტრატეგიულ კატასტროფა გამოიწვია.

იემენში მთავრობასა და ჰუსტების დაჯგუფებას შორის შეტაკებები 2014 წელს დაიწყო. ვითარება გამწვავდა, როცა ერთი წლის თავზე არაბული ქვეყნების კოალიციამ, რომლის სათავეშიც საუდის არაბეთი იდგა, აშშ-ს, დიდი ბრიტანეთისა და საფრანგეთის მხარდაჭერით ჰუსიტებს საჰაერო დარტყმა მიაყენა. რამდენიმეწლიანი ომის შედეგად იემენში 110 ათასზე მეი ადამიანი გარდაიცვალა, ხოლო მილიონობით ადამიანი შიმშილის ზღვარზეა.

გაეროს შეფასებით, იემენში ყველაზე მწვავე ჰუმანიტარული კრიზისია, სადაც მოსახლეობის 80 პროცენტს დახმარება და უსაფრთხოება სჭირდება.