ჩინეთმა გაეროს უშიშროების საბჭოს განცხადება დაბლოკა, რომელიც მიანმარში სამხედრო გადატრიალებას გმობდა. გადატრიალება პირველ თებერვალს მოხდა, რა დროსაც პოლიტიკური ლიდერები, მათ შორის ქვეყნის ფაქტობრივი მმართველი, აუნ სან სუ ჩი დააკავეს.

გაეროს უშიშროების საბჭოს სხდომა 2 თებერვალს გაიმართა, თუმცა ერთობლივი განცხადება ვერ შეიმუშავეს. ჩინეთს, როგორც საბჭოს მუდმივ წევრს, ვეტოს უფლება აქვს.

ამასთან, მიანმარის საკითხებში გაეროს სპეციალურმა წარმომადგენელმა, კრისტინ შრანერმა სამხედრო გადატრიალება დაგმო, რომელიც არჩვენების არასასურველ შედეგებს მოჰყვა. მისი თქმით, ნოემბრის არჩევნები აუნ სან სუ ჩის პარტიის დამაჯერებელი გამარჯვებაა.

სამხედრო გადატრიალების შემდეგ ჩინეთი აცხადებდა, რომ სანქციები ან საერთაშორისო ზეწოლა ქვეყანაში ვითარებას უფრო გაართულებდა. გარდა ამისა, წარსულში რუსეთთან ერთად მას არაერთხელ დაუცვამს გაეროს კრიტიკისგან როჰინჯი მუსლიმების რეპრესიების გამო.

აუნ სან სუ ჩი, რომელიც ქვეყნის ფაქტობრივი მმართველია დაკავების შემდეგ არავის უნახავ. სამხედროებმა დააკავეს პრეზიდენტი და მმართველი პარტიის ლიდერები.

ახლა ხელისუფლება მთავარსარდალ მინ აუნ ჰლაინს გადაეცა. მთავრობაში შეიცვალა 11 მინისტრი და მოადგილე. მთავრობის პირველ სხდომაზე მთავარსარდალმა განაცხადა, რომ გადატრიალება გარდაუვალი იყო.

როგორც BBC წერს, გადატრიალების შემდეგ ქვეყანაში სიმშვიდე იყო, სამხედროები ყველა დიდ ქალაქში პატრულირებდნენ, ხოლო ღამით კომენდანტის საათი მოქმედებდა.