ნაციონალური მოძრაობის ლიდერმა, ნიკა მელიამ გირჩის ერთ-ერთ ლიდერს, იაგო ხვიჩიას სათამაშო თოფი აჩუქა. საჩუქარი მან ხვიჩიას TV პირველის ეთერში გადასცა.

"ეს სათამაშო ყოფილა, ნაღდი მეგონა. სხვათა შორის, გუშინ უცნობმა მაჩუქა მელიის ტყავი. ახლა შენგან ეს საჩუქარი მექნება და ერთად დავკიდებთ", — განაცხადა ხვიჩიამ, რაზეც მელიასგან პასუხად მიიღო: "მოითხოვე და მიიღე".

ხვიჩიამ აღნიშნა, რომ მელიას საჩუქარი ჩაეთვალა. კითხვაზე, "შერიგდით", მან უპასუხა:

"პოლიტიკურ საკითხებთან ერთად ესეც მოგვარდება, იმიტომ, რომ პირადად, პიროვნული ჩვენს შორის არაფერი არ ყოფილა".

მელიას სტუდიაში შესვლამდე ხვიჩიამ იარაღის შეძენის თემაზეც ისაუბრა. მისი თქმით, იარაღის ლეგალიზაციის მომხრეა, ამიტომ მის შეძენას პარლამენტში შესვლისთანავე აპირებდა. მისივე თქმით, მელიას "პრეცენდენტი" ამ მესიჯის გასაგზავნად გამოიყენა.

"უნდა გვეჩვენებინა ხალხისთვის, რომ რა უფლებაც ჩვენ გვაქვს, იმიტომ, რომ ვართ პარლამენტის წევრები, იგივე უფლება უნდა ჰქონდეს საქართველოს ნებისმიერ მოქალაქეს. მე მხოლოდ ამის თქმა მინდოდა, როცა ნიკა მელიას პრეცენდენტი პოლიტიკური მესიჯის გასაგზავნად გამოვიყეენ", — განაცხაად მან.

25 იანვარს იაგო ხვიჩიამ განაცხადა, რომ ნიკა მელიასთან მას "ცუდი" სატელეფონო საუბარი ჰქონდა და მოეჩვენა, რომ მელია "დაემუქრა კიდეც". ჟურნალისტის კითხვაზე, დაეზუსტებინა მელია ესაუბრა თუ არა მას მუქარის შემცველი ტონით, ხვიჩიამ გაიმეორა, რომ მას ასე მოეჩვენა. მისი თქმით, თუ ეს მართლა მუქარა იყო, იგი მიმართავს პარლამენტს, რომ თავის დაცვის მიზნით, იარაღის ტარების უფლება ჰქონდეს.